Qazaqstan EQYU Syrtqy ister mınıstrlerin 2010 jyldyń jazynda beıresmı kezdesýge shaqyrady - Q. Saýdabaev
A. Qańtardyń 20-sy. QazAqparat /Qanat Mámetqazyuly/ - Qazaqstan EQYU Syrtqy ister mınıstrlerin 2010 jyldyń jazynda beıresmı kezdesýge shaqyrady.
Búgin elordada EQYU-nyń qazirgi tóraǵasy, QR Memlekettik hatshysy-Syrtqy ister mınıstri Qanat Saýdabaev elimizde tirkelgen dıplomatııalyq korpýs ókilderimen kezdesýi barysynda osylaı málim etti, dep habarlaıdy QazAqparat.
«Aldaǵy mańyzdy mindetterdiń biri retinde 2010 jyly EQYU Sammıtine daıyndyq pen ony ótkizýge basa nazar aýdaratyn bolamyz. Sammıt jónindegi naqty usynymdar Afınyda ótken SMID qujattaryna engizildi, keıinnen bul Venada qoldaý tapty. Endigi másele sammıttiń kún tártibine jáne ony ótkizýdiń bárine birdeı qolaıly merzimin belgileýge qatysty barlyq áriptestermen kelisim úderisin jedeldetip bastaý bolyp otyr», dedi Q. Saýdabaev.
Sonymen birge, Memlekettik hatshy Qazaqstannyń EQYU-ǵa tóraǵalyǵy kezeńinde byltyrǵy tóraǵa - Grekııa eli salyp ketken ıgi dástúrler jalǵasatynyn atap ótti. «Osyǵan oraı, Qazaqstan EQYU-ǵa qatysýshy-memleketter Syrtqy ister mınıstrlerin 2010 jyldyń jazynda Almaty qalasynda beıresmı kezdesýge shaqyrady», dedi ol.
