Qazaqstan EQYU Sammıtin Prezıdent N.Nazarbaevtyń bedeliniń arqasynda ótkizgeli otyr - respýblıkalyq basylymdarǵa sholý

Baspasózderdiń búgingi sandaryna Úkimettiń keshe onlaın rejiminde ótken otyrysynda talqylanǵan birqatar máseleler arqaý bolǵan. «Egemen Qazaqstan» gazeti Mınıstrler Kabınetiniń májilisinde quqyq qorǵaý júıesin reforalaý, taý ken-metallýrgııa, elektr energetıkasy, agroónerkásiptik keshen, munaı-gaz, týrızm salalaryn damytýdyń 2010-2014 jyldar aralyǵyndaǵy kezeńdi qamtıtyn salalyq baǵdarlamalary talqylanǵanyn jazady. «Agroónerkásiptik keshendi damytýdyń jańa kezeńdik baǵdarlamasy týraly baıandama jasaǵan Aýyl sharýashylyǵy mınıstri Aqylbek Kúrishbaevtyń aıtýynsha, 8 baǵyttan turatyn baǵdarlamany júzege asyrý nátıjesinde elimizdegi astyq óndirisiniń ortasha jyldyq kólemi 17,8 mln. tonna deńgeıinde qalyptasyp, onyń eksporttyq áleýeti qazirgi 6,7 mln. tonnadan 8,6 mln.tonnaǵa ulǵaıady, al astyq eksportyndaǵy óńdelgen ónim úlesi 32 paıyzdan 50 paıyzǵa deıin ósedi. Mal sharýashylyǵynda asyl tuqymdy maldardyń ortasha úlesin qazirgi 6 paıyzdan 14 paıyzǵa deıin kóterý kózdelinip otyr. Aýyl sharýashylyǵyndaǵy sýbsıdııalardyń ortasha deńgeıi 20 paıyzdan 25 paıyzǵa deıin kóbeıe túspek», dep jazady basylym «Salalar damýynyń jańa mejeleri» degen taqyryppen basylǵan maqalasynda.

«Egemen Qazaqstan» gazetinde jarııalanǵan kezekti maqalada keshe Memleket basshysy Nursultan Nazarbaev Polshanyń eks-prezıdenti Aleksandr Kvasnevskıı men Avstrııa Respýblıkasynyń federaldyq eks-kantsleri Alfred Gýzenbaýerdi qabyldaǵany jazylǵan. Júzdesýden keıin BAQ ókilderimen bolǵan baspasóz máslıhatynda A.Gýzenbaýer: «EQYU-nyń Ystambulda sammıti bolǵan ýaqyttan bergi on bir jyl boıy kóptegen elderdiń úkimetteri osyndaı forýmdy uıymdastyrýǵa umtyldy, bul tek Qazaqstannyń ǵana qolynan keldi. Tipti, osynyń ózi - zor jetistik. Ekinshiden, sammıt osy bedeldi Uıymdaǵy Qazaqstannyń mańyzdylyǵyn atap kórsetedi. Men sizderdiń respýblıkalaryńyz úshin bul sammıtti uıymdastyrý, bárinen buryn, Nursultan Nazarbaevtyń bedeliniń arqasynda múmkin boldy dep oılaımyn. Kóp memleketterdiń basshylary úlken kezdesýge Prezıdent Nursultan Nazarbaevqa degen jeke qurmeti úshin keledi», - dep atap ótken.

***
«Aıqyn» gazetiniń dástúrli «Aq sóıle!» aıdarynyń búgingi sanynyń qonaǵy - QR Parlamenti Májilisiniń depýtaty Berik Bekjanovtan alynǵan suhbat «EQYU-ǵa tóraǵalyq etýimiz - ómir zańdylyǵy», degen taqyryppen berilgen. Suhbattasý barysynda tilshi saýaldaryna tuşymdy jaýap bergen depýtat: «Astana sammıtiniń tarıhta sózsiz qalatynyn qazirden-aq batyl aıtýǵa bolady. Aldaǵy sammıtte Qazaqstannyń EQYU tóraǵasy retinde bir jylda atqarǵan jumysy qaralady. EQYU-ǵa tóraǵalyq etý kezinde álem elderin alańdatqan, dúnıejúzin tolǵandyrǵan nebir túıtkildi máseleler talqy tarazysyna salynýda. Al osy máselelerdiń oń sheshimin tabýy, durys baǵytta úılestirilýi - bıylǵy jylǵy Qazaqstannyń tóraǵalyǵyna tikeleı baılanysty», deıdi. Suhbattyń tolyq nusqasyn oqyǵyńyz kelse, «Aıqyn» gazetiniń búgingi nómirin jiberip almańyz.

«Nemis mamany baptaıtyn ulttyq quramamyz taǵy da synaqtan ótedi. Bul joly qazaq jerine Belgııa men Germanııa fýtbolshylary keledi. 2012 jyly ótetin Eýropa chempıonatynyń irikteý kezeńi aıasyndaǵy qos kezdesýge jankúıer qaýymdy kóbirek tartý qamyn kúıttegen fýtbol basshylarymyz qoldan kelgenshe árekettenýde. Al tizgini Bernd Shtorkqa tapsyrylǵan quramamyz azýly qonaqtarymyzǵa qoldan kelgenshe qarsylasa alar ma eken?», dep jazady «Aıqyn» gazeti búgingi sanynda. Basylymnyń sport betinde jaryq kórgen maqala «Qos quramaǵa qaýqar kórsete alamyz ba?» degen taqyryppen berilgen.

***

«Tórteý túgel bolsa, Kaspııge qaýip joq». «Alash aınasy» gazetiniń sársenbilik sanynda osyndaı taqyryppen jaryq kórgen bas maqalada keshe elordada ótken «Eýrazııanyń energetıkalyq kartasy: táýekelder teńgerimi jáne jańa múmkindikter» taqyrybyndaǵy V Eýrazııalyq energetıkalyq forýmda talqylanǵan máseleler baıandalǵan. «Eýrazııalyq qurlyqtyń kindiginde jatqan Qazaqstan óńirlik mańyzy bar bastamalarǵa muryndyq bolmaýǵa qaqysy joq. mundaı bastamalar meıli geosaıası, ekonomıkalyq, áleýmettik jáne gýmanıtarlyq sıpatta bolsyn, tek bizdiń el ǵana emes, bizdi aınala qońsy qonǵan kórshi memleketter men tutastaı óńir úshin asa mańyzdy máselelerdi qamtyp, keıde tipti jahandyq mánge ıe bolyp jatady. Bul zańdylyq ta. Óıtkeni batysynan shyǵysyna deıin ushqan qustyń qanaty talatyn Qazaqstan - búginde eýrazııalyq keńistiktegi turaqylyqtyń tórt tuǵyry - ekonomıkalyq, energetıkalyq, ekologııalyq jáne azyq-túlik qaýipsizdik máselesinde eleýli yqpalǵa ıe elderdiń biri», delingen joǵarydaǵy taqyryppen berilgen basylym maqalasynda

Taıaýda Elbasymyz issaparmen barǵanda Ońtústik Qazaqstan oblystyq prokýratýrasy «Jol kartasy», «Taza sý», «100 mektep, 100 aýrýhana» baǵdarlamalarynyń birshama máselelerdi sheshýge oń yqpalyn tıgizgenin aıtyp, esep bergen bolatyn. Endi búginde odan shıkilik shyǵyp, atalǵan baǵdarlamalarǵa bólingen qarjynyń shetinen «kemirgen», ıaǵnı, óz jeke múddesine paıdalanǵan sheneýnikter men azamattar áshkerele bolyp otyr. Bul jaıynda tolyǵyraq «Alash aınasy» gazetiniń búgingi sanyndaǵy «Jol kartasy» jonyp jeı beretin qazy-qarta ma?» degen taqyrypta berilgen maqaladan oqyp, bilesizder.

***

Keshe Memleket basshysy Nursultan Nazarbaev "Jalpyǵa birdeı kásipodaqtar konfederatsııasy" halyqaralyq kásipodaqtar birlestiginiń bas hatshysy Vladımır Şerbakovty qabyldady. «Kazahstanskaıa pravda» gazetiniń jazýynsha, kezdesý barysynda V.Şerbakov Prezıdentti Jalpyǵa birdeı kásipodaqtar konfederatsııasy tóralqasynyń sheshimimen kásipodaqtar qozǵalysyna qosqan úlesi úshin TMD-nyń Jalpyǵa birdeı kásipodaqtar konfederatsııasynyń joǵary nagradasy - Altyn belgimen marapattalǵany týraly habardar etip, nagradany tapsyrǵan. «Nursultan Nazarbaev - Jalpyǵa birdeı kásipodaqtar konfederatsııasynyń Altyn belgisimen marapattalǵan jalǵyz Prezıdent. Nursultan Ábishulynyń basshylyǵymen Qazaqstan Konstıtýtsııanyń asa mańyzdy baptarynyń biri - áleýmettik memleket qurýdy iske asyrýda barynsha joǵary nátıjege qol jetkizdi. Barlyq ólshemder boıynsha, eń tómengi eńbekaqy deńgeıi bolsyn, zeınetkerlerge kórsetilgen qamqorlyqtar bolsyn, ortasha eńbekaqy, halyqty, ásirese daǵdarys kezeńinde jumyspen qamtýda bolsyn Qazaqstan joǵary deńgeıden kórindi», - dep atap kórsetken jýrnalısterge arnalǵan brıfıngte V.Şerbakov.