Qazaqstan EQYU-nyń Maastrıht strategııasyn
ASTANA. 1 jeltoqsan. QazAqparat /Marlan Jıembaı/ - Qazaqstan EQYU-nyń Maastrıht strategııasyn "Maastrıht plıýs» qujatymen tolyqtyrýdy usynady.
Bul týraly búgin elordadaǵy Táýelsizdik saraıynda ótip jatqan Astana Sammıtiniń ashylý rásiminde sóz alǵan QR Prezıdenti N. Nazarbaev málim etti.
EQYU-nyń sebeti men ınstıtýttaryn tolyqtyrý qajettigi týyndap otyrǵandyǵyn basa aıtqan Elbasy: «birinshi - ekonomıkalyq pragmatızm. Bul 21 ǵasyr qaýipsizdik júıesiniń irgetasy. Osyǵan oraı ekonomıkany turaqtaný jónindegi Eýropalyq Odaqtyń kúsh-jigeri qoldaýǵa turarlyq», - dedi.
Sondaı-aq Memleket basshysynyń atap ótýinshe, úlken segizdik pen jıyrmalyq álemdik qarjy daǵdarysyn eńserýdi talqylaý ústinde. Alaıda álemdik ekonomıkanyń jáne valıýtalyq júıeniń jańa konfıgýratsııasyn izdeý úrdisi tym baıaý júrýde. Osyǵan oraı Elbasy, «EQYU-nyń ekonomıkalyq qaýipsizdikti nyǵaıtý jónindegi kúsh-jigeri basymdyqqa aınalyp, al qarjy-ekonomıkalyq qaýipsizdik jeke sebet retinde bóliner edi» degen pikirin alǵa tartty.
«Biz sonymen qatar EQYU-nyń Maastrıht strategııasyn "Maastrıht plıýs» qujatymen tolyqtyrýdy usynamyz. Onda valıýtalyq-qarjy saıasatyn, ekonomıkalyq yntymaqtastyq jáne yqpaldasýdyń kelisilgen ustanymdaryn kórinis tapqyzýǵa bolady», - dedi N.Nazarbaev.
Sonymen qatar Memleket basshysy EQYU qurylymyn energetıkalyq qaýipsizdik, ekonomıkalyq ózara árekettesý jónindegi keńestermen tolyqtyrý maqsatty bolyp tabylatyndyǵyn basa aıtty.
Qorshaǵan ortany qorǵaý salasynda EQYU-nyń Ekologııalyq forýmyn qurý qajettigin usynǵan QR Prezıdenti: «ol birqatar problemalardy sheshýge, máselen, Aral teńizin saqtaý nemese Semeı ıadrolyq synaq polıgony aýmaǵyn jańǵyrtýǵa muryndyq bolar edi», dedi.
Elbasy óz sózinde sý problemasyn quqyqtyq retteý maqsatynda sý tapshylyǵyna ushyrap otyrǵan elderde «Sý jáne quqyq» baǵdarlamasyn ázirleý ózektigin de atap ótti.
