Qazaqstan EQYU-nyń damýyna úlken úles qosty - dóńgelek ústel
ALMATY. 18 qarasha. QazAqparat /Erbol Azanbek/ - Astana sammıti EQYU damýynyń jańa betterin ashady. Búgin Almatyda ótken «Astanadaǵy Sammıt: gýmanıtarlyq áriptestiktiń ulǵaıýy» atty dóńgelek ústelde QR Prezıdenti janyndaǵy Strategııalyq zertteýler ınstıtýtynyń dırektory Bolat Sultanov osylaı aıtty.
Onyń pikirinshe, Qazaqstan EQYU-nyń damýyna úlken úles qosty. "Bizdiń Elbasynyń bastamasymen dıplomatııalyq leksıkonǵa jańa termınder qosyldy. Eger buryn uıym qyzmetiniń eýroatlantıkalyq baǵyty týraly aıtyp kelsek, qazir barlyq qujattarda EQYU-nyń eýroatlantıkalyq jáne eýrazııalyq baǵyty týraly jazyla bastady»,- dedi ınstıtýt dırektory.
Dóńgelek ústelde Qazaqstan EQYU-ǵa tóraǵalyǵy kezinde konfessııaaralyq, etnıkaaralyq toleranttyq pen mádenıetaralyq dıalog, azamattyq qoǵamnyń damýy syndy adamı ólshemderge basty nazar aýdarǵany aıtyldy.
Qatysýshylardyń pikirinshe, adamı ólshemderdiń bul kórinisi qazirgi kezde qazaqstandyq úlgi retinde qalyptasyp úlgerdi. Osyǵan baılanysty sońǵy ýaqytta toleranttyqtyń «qazaqstandyq úlgisi» halyqaralyq jetekshi sarapshylar men saıasatkerlerdiń qyzyǵýshylyǵyn arttyryp otyr, deıdi saparshylar.
Shara barysynda bunymen qatar EQYU-nyń damýyndaǵy Qazaqstan úlesi, gýmanıtarlyq áriptestik, Astanadaǵy sammıt máseleleri sóz boldy.
