Qazaqstan EQYU-nyń beıbitshilikti nyǵaıtýǵa baǵyttalǵan barlyq bastamasyn qoldaıdy - G.Ábdiqalyqova

ASTANA. QazAqparat - Qazirgi saıası jaǵdaı qaýip-qaterlerge tótep bere alatyndaı qaýipsizdiktiń arhıtektýrasyn nyǵaıtýdy talap etedi. Bul úshin 1975 jyly Helsınkı qorytyndy aktisine múshe memleketter keliskendeı, adamzat turaqtylyqta ómir súretin ortaq eýropalyq qaýipsizdik júıesin jetildirý kerek.

Bul týraly búgin Syrtqy ister mınıstrliginde ótip jatqan «Helsınkı qorytyndy aktisiniń (1975) jəne Astanadaǵy Sammıttiń (2010) mereıtoıyna arnalǵan EQYU jetistikteri men qaterleri» atty halyqaralyq konferentsııada QR Memlekettik hatshysy Gúlshara Ábdiqalyqova málim etti.

«Batys pen shyǵystyń arasyn baılanystyryp otyrǵan EQYU álemde daǵdarys pen shıelenisterdiń aldyn alý jónindegi tarıhı mıssııasyn oıdaǵydaı oryndap otyr. Degenmen, ózderińiz biletindeı, búgingi saıası shyndyq qaýipsizdik arhıtektýrasyn nyǵaıtýdy talap etedi. Bul úshin 1975 jyly Helsınkı qorytyndy aktisine múshe memleketter keliskendeı, adamzat turaqtylyqta ómir súretin ortaq eýropalyq qaýipsizdik júıesin jetildirý kerek. Shıelenistermen kúres salasyndaǵy EQYU-nyń qolda bar áleýeti jáne osy baǵytta EQYU negizin qalaǵan barlyq mehanızmder óte biregeı ári nátıjeli. Qazaqstan EQYU-nyń halyqaralyq negizdi basshylyqqa ala otyryp, beıbitshilik pen qaýipsizdikti nyǵaıtýǵa, halyqaralyq qarym-qatynastardaǵy senimdi kúsheıtýge baǵyttalǵan barlyq bastamasyn qoldaıdy»,-dep málimdedi Memlekettik hatshy.

G.Ábdiqalyqova eske salyp ótkendeı, 2010 jyly óz tóraǵalyǵynyń qorytyndysy retinde EQYU Sammıtin ótkizgen Qazaqstan eń aldymen osy senim sharalaryn nyǵaıtýǵa kóńil bólgen edi. Astana sammıtinde kóbine Eýro-Atlantıka men Eýrazııalyq keńistiktegi qaýipsizdikti nyǵaıtý, Aýǵanstandaǵy máseleler men bir ornynan jyljymaı kele jatqan shıelenisterdi sheshý máselelerine nazar bólingen edi.