Qazaqstan EQYU-na tóraǵalyq tusynda álemde qalyptasqan qaıshylyqtardy sheshýge barynsha kúsh salady - Q.Saýdabaev
ASTANA. Qańtardyń 14-i. QazAqparat /Aıdar Ospanalıev/ - «Álemde qalyptasqan jáne uzaq ýaqyttarǵa sozylǵan túrli qaıshylyqtar men qaqtyǵystardy sheshý osyǵan deıin halyqaralyq uıymnyń basty mindetteriniń biri bolyp kelgen.
Bul mindetti atqarý isine Eýropadaǵy qaýipsizdik jáne yntymaqtastyq uıymyna tóraǵalyq etý tusynda biz de óz úlesimizdi qossaq degen nıettemiz. Menińshe, bizdiń uıym aqyry tek adamzattyń tragedııasy men túrli apattarǵa alyp keletin mundaı qaqtyǵystardyń múmkindiginshe aldyn ala bilýi kerek», dedi búgin QR Memlekettik hatshysy- Syrtqy ister mınıstri Qanat Saýdabaev Eýropadaǵy qaýipsizdik jáne yntymaqtastyq uıymy Turaqty keńesiniń 789-shy májilisinde, dep habarlaıdy QazAqparat.
Mınıstr sózinde EQYU-nyń tóraǵasy retinde aǵymdaǵy jyldyń
aqpan aıynyń orta tusynda Ońtústik Kavkaz elderine sapar jasap qaıtatyndyǵyn atap kórsetti. Sondaı-aq ol búgingi jıynǵa qatysýshylarǵa Kavkaz aımaǵyndaǵy jaǵdaıdy retteý maqsatyndaǵy kómekteri men aqyl-keńesteri úshin rızashylyǵyn bildirdi. «Afınyda qabyldanǵan ıadrolyq qarýdy taratpaý jónindegi mınıstrlikter deklaratsııasyna sáıkes, álemde jappaı qyryp-joıý qarýlaryn taratpaý jónindegi kóshbasshylardyń biri sanalatyn Qazaqstan
EQYU-nyń ıadrolyq qarýsyzdanýdy jahandyq qoldaý jónindegi mindettemelerin de oryndaýǵa úles qosady. Biz, ásirese, zańsyz esirtki aınalymy men terrorızmmen jáne qazirgi zamannyń ózge de qaýip-qaterlerine qarsy kúreske barynsha kúsh salatyn bolamyz. Bul rette biz osy máselege baılanysty Afınyda qabyldanǵan sheshimderdi qýana qoldaımyz», dedi Syrtqy ister mınıstri.
