Qazaqstan EQYU-ǵa tóraǵalyq kezeńinde ultaralyq qarym-qatynastar salasyndaǵy oń tájirıbesin tolyq paıdalanýǵa tyrysady - Q. Saýdabaev
annyń 26-sy. QazAqparat /Ernur Aqanbaı/ - Qazaqstan 2010 jyly EQYU-ǵa tóraǵalyq kezeńinde ultaralyq qarym-qatynastar salasyndaǵy oń tájirıbesin tolyq paıdalanýǵa tyrysatyn bolady.
Bul týraly búgin Qazaqstan halqy Assambleıasy keńesiniń keńeıtilgen májilisinde QR Memlekettik hatshysy - QR Syrtqy ister mınıstri Qanat Saýdabaev aıtty, dep habarlaıdy QazAqparat.
«Beıbitshilik pen kelisimdi qamtamasyz etý, Qazaqstan azamattarynyń ulty men dinine qaramastan barlyǵynyń teńdigi bizdiń táýelsiz memleketti qalyptastyrýdaǵy Nursultan Nazarbaevtyń strategıasynyń tabysty júzege asýynyń senimdi irge tasy boldy. Memleket basshysynyń osy saıasaty Qazaqstannyń dáıekti damýynyń aıqyndaýshy faktory boldy jáne solaı bola beredi. Ultaralyq qarym-qatynastar salasyndaǵy bizdiń oń tájirıbemiz, N. Ábishulynyń tamasha saıası noý-haýy Qazaqstan halqy Assambleıasynyń tabysty qyzmeti qazirgi tańda álemde zor qyzyǵýshylyq pen qurmet týdyryp otyr. Jáne biz elimizdiń EQYU-ǵa tóraǵalyǵy kezeńinde osy tájirıbeni tolyq paıdalanýǵa tyrysatyn bolamyz», dedi májiliste Q. Saýdabaev.
«Osyǵan baılanysty Ulttyq birlik doktrınasy aıryqsha mazmunǵa ıe bolyp otyr, al Qazaqstan halqy Assambleıasyna aıyryqsha jaýapkershilik júktelýde», dedi ol.
QR Memlekettik hatshy - Syrtqy ister mınıstri Qazaqstannyń EQYU-ǵa tóraǵalyǵy Shyǵys pen Batystyń gýmanıtarlyq dıalogy kúrdeli ýaqytty basynan keship jatqan kezeńge dóp kelgenin atap kórsetti. «Qazaqstan órkenıetter, mádenıetter men dinder arasyndaǵy turaqty dıalogtyń bastamashylyǵy rólin oryndaýdy jalǵastyryp qana qoımaı, sonymen qatar onyń belsendi ilgeriletýshisi bolýǵa daıyn» dep atap kórsetti Q. Saýdabaev.
