Qazaqstan EQYU-ǵa tóraǵalyq etý barysynda barlyq múshelerdi ortaq problemalar úshin jaqyndastyra túskisi keledi - Elbasy
A. Qarashanyń 13-i. QazAqparat /Qanat Mámetqazyuly/ ‑ Qazaqstan EQYU-ǵa tóraǵalyq etý barysynda barlyq múshelerdi ortaq problemalar úshin jaqyndastyra túskisi keledi.
Bul týraly búgin Qazaqstan Respýblıkasynyń Prezıdenti Nursultan Nazarbaevtyń respýblıkalyq telearnalar boıynsha ótip jatqan tikeleı jelidegi suhbaty barysynda málim boldy, dep habarlaıdy QazAqparat.
«EQYU-nyń birqatar músheleri Qazaqstan óńirindegi jaǵdaıǵa syn kózben qaraıtyny belgili. Óıtkeni EQYU shtabynyń adam quqyqtary jónindegi jarııalanymdarynda 177 eskertpe bizdiń elimizge qatysty bolsa, Reseıge qatysty 100-den astam eskertpe jasaǵan. Árıne, buny qıǵash ketkendik dep ataýǵa bolady. Al Qazaqstannyń tóraǵalyqqa saılanǵany bizdiń elimiz ben uıym arasyndaǵy ózara túsinistikti kórsetedi. EQYU barlyǵymyzǵa qajetti uıym. Qazaqstan onyń nyǵaıýyna múddeli. Sol úshin de qaýipsizdik, ıadrolyq qarýsyzdaný, jappaı qyryp-joıý qarýlaryn qysqartý máseleleri boıynsha, Aýǵanstan problemalary men jańa qaýipter problemasyna Qazaqstan belsendi aralasady», dedi N. Nazarbaev.
Sonymen birge, EQYU-ǵa tóraǵalyq etý barysynda Qazaqstanda oryn alyp otyrǵan ekologııalyq máselelerge de nazar aýdarylatynyn aıtqan Elbasy, bul rette ıadrolyq polıgon men Aral teńiziniń problemasy da qozǵalatynyn atap ótti. «Jalpy, biz osy turǵyda barlyq EQYU múshelerin jaqyndastyra túskimiz keledi. Sondyqtan da, men 2010 jyly EQYU qatysýshy memleket basshylarynyń sammıtin ótkizý týraly bastama kóterip otyrmyn. 1999 jyldan beri bundaı sammıt ótpepti. Sondyqtan da, eń bolmaǵanda EQYU memleket basshylary qazirgi jaǵdaıdy baǵalap, bolashaqtaǵy josparlardy birige ázirleý kerek», dedi N. Nazarbaev.
