Qazaqstan eksportynyń kólemi 10 paıyzǵa ulǵaıdy

dep habarlady pm.kz saıty «Kaznex Invest» agenttiginiń baspasóz qyzmetine silteme jasap.

 «Aǵymdaǵy jyldyń І jartyjyldyǵynyń qorytyndysy boıynsha, Qazaqstanda eksport kólemi 46,8 mlrd. AQSh dollaryn qurady, bul 2011 jyldyń sáıkes kezeńindegi kórsetkishten 10 paıyzǵa kóp», - delingen habarlamada.

Onyń ishinde, óńdelgen taýarlardyń eksporty 22 paıyzǵa artyp, 11,7 mlrd. dollardy qurasa, shıkizat emes taýarlar eksportynyń úlesi - 25,05 paıyzdy qurady.

Óńirlerge jikteıtin bolsaq, óńdelgen eksporttyń Eýroodaq elderine jóneltilgen úlesi - 2,6 mlrd. dollardy, Qytaı Halyq Respýblıkasyna - 2,1 mlrd. dollardy, Reseı Federatsııasy men Belarýs Respýblıkasyna - 1,8 mlrd. dollardy quraıdy. Bular - ferroqorytpa, munaı ónimderi, gaz ónimderi, rafınadtalǵan mys, ýran, myrysh sııaqty ónimder.

Aıta ketý kerek, unnyń eksporty 74 paıyzǵa artyp, 317 mln. AQSh dollaryn qurap otyr. Eksport ásirese, Ózbekstan, Aýǵanstan, Tájikstan sııaqty dástúrli ótkizý naryqtary  baǵytynda artyp otyr.

Sondaı-aq sary fosfor eksporttyń kólemi 4 paıyzǵa artqan. Aǵymdaǵy jyldyń І jartyjyldyǵynda bul ónimniń eksporty 84,5 mln. AQSh dollarǵa jetti. Al 2011 jyldyń qorytyndysy boıynsha Qazaqstan sary fosfor  eksporttyń kólemi boıynsha birinshi orynǵa shyqqan bolatyn.