Qazaqstan eksporty ótken 9 aıda 42,5 paıyzǵa, ımport 23,8 paıyzǵa qysqardy
ASTANA. QazAqparat - Qazaqstan eksporty 2015 jyldyń 9 aıynda 42,5 paıyzǵa, ımport 23,8 paıyzǵa qysqardy. Búgin Senatta «2016 - 2018 jyldarǵa arnalǵan respýblıkalyq bıýdjet týraly» zań jobasynyń tanystyrylymy barysynda QR Ulttyq ekonomıka mınıstri Erbolat Dosaev osylaı málimdedi.
«Teńge baǵamynyń álsireýi nátıjesinde aǵymdaǵy jylǵy qazanda ınflıatsııa 5,2 paıyzdy, jyldyq mánde 9,4 paıyzdy qurady. Aǵymdaǵy jaǵdaıdy eskere otyryp, 2015 jyly jalpy ishki ónimniń naqty ósý boljamy 0,3 paıyzdyq tarmaqqa 1,2 paıyzǵa deıin tómendedi. Sonymen qatar, aǵymdaǵy jyly naqtylanǵan nomınaldy jalpy ishki ónim 41 701,2 mlrd.teńgeni quraıdy, ol aqpan aıyndaǵy kórsetkishpen salystyrǵanda 393,6 mlrd. teńgege joǵary», - dedi Erbolat Dosaev.
Onyń aıtýynsha, jan basyna shaqqandaǵy jalpy ishki ónim 2015 jyly 10 830 AQSh dollaryn quraıtyn bolady. Budan bólek, 2015 jyly ónerkásipte 1,8 paıyzǵa tómendeý kútilýde, bul aqpandaǵy boljamnan 1,5 paıyzdyq tarmaqqa tómen bolyp otyr. Al bıylǵy jyly munaı óndirý 79,0 mln. tonna kóleminde boljanady, ol buǵan deıin josparlanǵan kólemnen 1,5 mln. tonnaǵa tómen.
«Ulttyq banktiń boljamdary boıynsha eksport kólemi 2015 jyly 39,2 paıyzǵa 48,8 mlrd. dollarǵa deıin, ımport 21,0 paıyzǵa 34,4 mlrd. dollaryna deıin tómendeıtini boljanady», - dedi mınıstr.
