Qazaqstan eksportty 30 paıyzǵa arttyrdy
Búgin Úkimet otyrysynda 2018 jylǵy qańtar-qyrkúıektegi áleýmettik-ekonomıkalyq kórsetkishter týraly baıandaǵan Ulttyq ekonomıka mınıstri Tımýr Súleımenov eksport-ımportqa qatysty kórsetkishterdi atady.
«Álemdik taýar naryqtaryndaǵy qolaıly konıýnktýraǵa baılanysty syrtqy saýda aınalymy turaqty ósý trendin saqtap otyr. Jyl basynan bergi 8 aıdyń ishinde ósim 21,6 paıyzdy (59,8 mlrd AQSh dollaryn) qurady», - dedi Ulttyq ekonomıka mınıstri.
Tımýr Súleımenovtyń aıtýynsha, Qazaqstannyń eksporty 28,2 paıyzǵa (39,1mlrd AQSh dollaryna) ósken. Bul, munaı eksportynyń 5,4 paıyzǵa, agroónerkásip kesheni ónimderiniń - 30,1 paıyzǵa, munaı-gazdyń - 30,2 paıyzǵa, alıýmınııdiń - 24 paıyzǵa jáne mys kenderi eksportynyń 12,5 paıyzǵa artýynan bolyp otyr.
«Import 10,8 paıyzǵa (20,8 mlrd AQSh dollaryna) ósti. Ósim negizinen ımporttalatyn ınvestıtsııalyq taýarlar (mashına jáne jabdyqtar) esebinen bolyp otyr. Olardyń ósimi 20,4 paıyzdy qurady. Sondaı-aq, qara metall men farmatsevtıka ónimderiniń ımporty tıisinshe 15,8 jáne 13,6 paıyzǵa artty», - dedi vedomstvo basshysy.
Buǵan deıin habarlaǵanymyzdaı, Qazaqstanda eksporttalatyn taýarlar baǵasy 2018 jyldyń tamyzynda onyń aldyndaǵy aımen salystyrǵanda - 3,5 paıyzǵa, 2017 jyldyń jeltoqsanyna qaraǵanda 13,3 paıyzǵa artty.
