Qazaqstan eksporttaıtyn qyzmetterdiń kólemi rekord kórsetip, 24,9 mlrd dollarǵa jetti

ASTANA. KAZINFORM – 2024 jyly Qazaqstan eksporttaǵan qyzmetterdiń aqshaǵa shaqqandaǵy kólemi 2023 jylmen salystyrǵanda 8,2% ósip, 24,9 mlrd dollarǵa jetti. Qazaqstan qarjygerler qaýymdastyǵynyń málimetinshe, bul – tarıhı kórsetkish.

- Eksporttalǵan qyzmetterdiń basym baǵyty kólik qyzmetteri (47%), saparlar (21%) jáne qarjy qyzmetteri (8%) boldy. Onyń ishinde qarjy jáne saqtandyrý qyzmetteriniń eksport kólemi 2023 jylmen salystyrǵanda 123,9 mln dollarǵa (+12%) ósip,1,2 mlrd teńgege jetti.

Qyzmetter ımportynda syrtqy saparlar men saýda qyzmetteriniń, kásibı jáne konsýltatsııalyq qyzmetterdiń ústemdigi saqtalyp otyr. Atalǵan qyzmet túrleriniń ımporttaǵy jıyntyq úlesi 74% boldy, - dep jazylǵan qaýymdastyqtyń resmı saıtynda.

Qarjygerler qaýymdastyǵynyń sarapshylary syrtqy saparlardyń kólemi aqshaǵa shaqqanda 521 mln dollarǵa óskenin aıtyp otyr. ıAǵnı, shetelde demalýshy týrısterdiń sany arta túsken nemese iskerlik máselemen, bilim alý maqsatymen saparlaý kólemi artqan.

- Qazaqstannan ózge elderge qatynaıtyn áýe reısteriniń kóbeıýi men shetelge jasalatyn saparlar qunynyń artýy, ishki týrızm ınfraqurylymynyń sapasy da bul ósimge qosymsha faktor bolýy yqtımal, - dep jazylǵan saraptamada.

Al telekommýnıkatsııa, kompıýter jáne aqparattyq tehnologııalar qyzmetiniń ımporty 2023 jylǵydan 20% nemese 151,6 mln dollarǵa qysqarǵan. Sondaı-aq, kólik qyzmetteriniń ımporty 3,8% nemese 131,4 mln dollarǵa kemigen. Qaýymdastyq mamandary muny logıstıkalyq tizbekterdiń tarylyp, syrtqy saýda baǵyttarynyń ózgerýimen baılanystyrady. 

Eske salsaq, elimizde mal terisi men júnin shetelge shyǵarýǵa qoıylǵan kedendik baj salyǵyn joıý týraly sheshim qabyldanǵan bolatyn.