Qazaqstan eksporttaýshy elderge 8 myń tonnadan astam ónimdi keri qaıtardy

NUR-SULTAN. QazAqparat - Qazaqstan jáne EAEO zańnamalarynda belgilengen karantın talaptary buzylǵany úshin 8 myń tonnadan astam ónim eksporttaýshy elderge keri qaıtaryldy, dep habarlaıdy QazAqparat AShM baspasóz qyzmetine silteme jasap.

Agroónerkásiptik keshendegi memlekettik ınspektsııa komıteti málimetinshe, bıylǵy jyldyń úsh aıynyń qorytyndysy boıynsha elimizge ákelingen joǵarǵy táýekeldegi fıtosanıtarııalyq karantındik ónimge qarasty tekseris nátıjesinde, 800-den astam zań buzýshylyq anyqtalǵan. Onyń ishinde 110 fakt karantın obektileri retinde tirkelgen bolsa, 500-den astamynda tıisti qujaty sáıkes kelmegen nemese múldem joq bolyp shyqqan.

Osyǵan oraı, Qazaqstan jáne EAEO zańnamasynda belgilengen karantın talaptarynyń buzylýyna baılanysty, eksporttaýshy elderge 8 myńnan astam tonna ónim keri qaıtaryldy. Qaıtarylǵan ónimniń kólemi boıynsha eksporttaýshy elder kóshin Qytaı (6 022,2) men Reseı Federatsııasy (1 136,2) bastap tur. Odan bólek Ózbekstan (439,2 tonna), Qyrǵyzstan (307,4 tonna), Ázerbaıjan (303,6 tonna), Iran (243 tonna) jáne Túrikmenstan (212,5 tonna).

Ónimderdiń basym kópshiligi qyzanaq, burysh jáne arpa ónimderi. Onda qyzanaq jemisiniń qońyr ájim vırýsy, aramsoıaý, batys gúl trıpsi, Komstok qurty jáne taǵyda basqa karantın obektileri anyqtaldy.

Aıta ketsek, talaptardy buzǵan tarap ákimshilik jaýapkershilikke tartylyp, 37 mln teńgege jýyq aıyppul salyndy.