Qazaqstan eksportqa konteınerlik tasymaldar úlesin 30%-ǵa deıin kóbeıtýdi kózdep otyr

NUR-SULTAN. QazAqparat – Konteınerlik tasymal kólemin arttyrý úshin otandyq konteınerler óndirisin ashý boıynsha jumys júrgizilip jatyr.2022-2023 jyldary 2 mln tonna júkti konteınerleý jáne konteınerlik tasymaldar úlesin 30%-ǵa deıin (eksport) kóbeıtý josparlanǵan. Bul týraly Daǵdarysqa qarsy sharalar jónindegi jedel shtab otrysynda aıtyldy, dep habarlaıdy QazAqparat primeminister.kz-ke silteme jasap.

Bıznes qoǵamdastyqtyń qazaqstandyq júkterdiń tasymaldanýyna qatysty alańdaýshylyǵyna baılanysty «Qazaqstan Temir Joly» UK» AQ basqarma tóraǵasy N. Saýranbaev eksporttyq baǵyttaǵy júkterdi tasymaldaý temir jol kóligimen de, teńiz porttary arqyly da shtattyq rejımde júzege asyrylyp jatqanyn habarlady. Sondaı-aq, N. Saýranbaev QHR-ǵa jáne keri baǵytta temir jol kóligimen júk tasymaldaý boıynsha eshqandaı kedergilerdiń joq ekenin jetkizdi.

Eýropa elderine úzdiksiz júk tasymalyn qamtamasyz etý maqsatynda Transkaspıı halyqaralyq kólik baǵyty arqyly Ázerbaıjan jáne Grýzııa (Baký, Batýmı jáne Potı porttary) baǵytynda tasymaldaý kólemin ulǵaıtý máselesi pysyqtalýda.

Óz kezeginde, QR ındýstrııa jáne ınfraqurylymdyq damý mınıstri Q. Óskenbaev Aqtaý jáne Quryq porttaryn paıdalanýdyń áleýeti zor ekenin atap ótti, sebebi olardyń qazirgi júktemesi nebary 23% ǵana qurap otyr jáne jetkilikti rezerv bar.

Sondaı-aq, Rıga, Ventspıls, Lıepaıa Baltyq porttary arqyly ótetin qosymsha baǵyttar pysyqtalýda.