Qazaqstan ekotýrızm áleýetin tolyq paıdalana almaı otyr — Premer-mınıstr
ASTANA. KAZINFORM — Byltyr Qazaqstanda ekotýrıster sany 3,6 mıllıonnan asqan. Áıtse de, ulttyq parkterdi damytý men ınvestor tartý qarqyny áli de tómen. Premer-mınıstr Oljas Bektenov Týrızm jáne ekologııa mınıstrlikterine, sondaı-aq ákimdikterge bir aıda ekotýrızmdi damytýǵa arnalǵan naqty usynystar ázirleýdi tapsyrdy.
Úkimet basshysy álemdik týrıstik ındýstrııanyń jyldam ósip kele jatqan baǵyttarynyń biri — ekotýrızm ekenin atap ótti.
Halyqaralyq sarapshylardyń baǵalaýynsha, jahandyq ekologııalyq týrızm naryǵy 2034 jylǵa qaraı 660 mlrd dollardan asýy múmkin.
— Byltyr Qazaqstandaǵy ekotýrıster sany 3,6 mln adamnan asty.
Bizde Sharyn shatqaly, Kólsaı kólderi, sondaı-aq Altyn-Emel, Іle-Alataýy, Býrabaı, Baıanaýyl ulttyq tabıǵı parkteri men basqa da keremet tabıǵı baılyqtarymyz bar. Alaıda olardy damytý men ınvestor tartý jumystarynyń qarqyny kóńilden shyqpaıdy. Jańa zamanaýı jobalar qajet. Týrızm, Ekologııa mınıstrlikteri men ákimdikter bir aıda naqty usynystar engizsin, — dedi O. Bektenov Úkimettiń búgingi otyrysynda.
Otandyq jáne sheteldik týrısterdi tartý úshin ulttyq parkter áleýetin anaǵurlym belsendi paıdalaný qajet.
— Bıylǵy jazǵy týrıstik maýsymǵa jeke toqtalǵym keledi. Birinshi kezekte, barlyq ákimdikter men mınıstrlikter demalýshylardyń qaýipsizdigin qamtamasyz etý úshin qosymsha aldyn alý sharalaryn qabyldaýǵa tıis. Demalýshylar úshin kýrorttyq aımaqtardy daıyndaý jumystaryn aqparattyq turǵydan barynsha belsendi túrde jarııalaý qajet. Sý aıdyndaryndaǵy qaýipsizdik erejeleri men órt qaýipsizdigi talaptaryn saqtaý boıynsha túsindirý jumystaryn júıeli negizde júrgizý kerek, — dedi ol.
Barlyq jedel áreket etý qyzmetteri joǵary daıyndyq jáne monıtorıng rejımine kóshirilýge tıis. Bul jumysqa volonterlerdi de tartqan jón.
— Barlyq demalys oryndarynda, saıabaqtarda jáne jaǵajaı aımaqtarynda arnaıy aqparattyq belgiler, shemalar men baǵyt-baǵdar kórsetkishteri ornatylýǵa tıis. Ákimdikter demalys oryndarynyń menshik ıelerimen birlesip, tazalyq ári sanıtarııalyq talaptardyń qatań saqtalýyn qamtamasyz etýi qajet. Týrısterdiń qaýipsiz ári jaıly demalysy osy salanyń negizgi standartyna aınalýǵa tıis, — dedi Oljas Bektenov.
Aıta keteıik, búgin Úkimet týrızmdi damytý máselelerin talqylady.
Buǵan deıin Oljas Bektenov vandalızmge qarsy baqylaýdy kúsheıtýdi tapsyrǵan edi.
