Qazaqstan ekonomıkasynyń ósý qarqyny 2,7 paıyzdy qurady

NUR-SULTAN. QazAqparat – Osy jyldyń qańtar-shilde aılarynda Qazaqstan ekonomıkasynyń ósý qarqyny 2,7 paıyzdy qurady. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Osy jyldyń qańtar-shilde aılarynda Qazaqstan ekonomıkasynyń ósý qarqyny 2,7 paıyzdy qurady. Osy esepti kezeńde negizgi trendter boıynsha naqty sektordaǵy dınamıkalyq jáne turaqty ósý, qyzmet kórsetý sektoryndaǵy dınamıkanyń jedeldeýi, óndirýshi emes sektorlardaǵy ınvestıtsııanyń joǵary ósýi, saýda balansynyń oń saldosynyń saqtalýy baıqalýda. Naqty sektor ekonomıkanyń ornyqty damý faktory bolyp otyr. Osy jyldyń qańtar-shildesinde naqty sektordaǵy ósim 3,6 paıyzǵa deıin jedeldedi», - dedi mınıstr.

Onyń aıtýynsha, iskerlik belsendilik qyzmet kórsetý salasynda 2 %-ǵa deıin ósti. Salalar arasynda aqparat jáne baılanys, qurylys, saýda, sýmen jabdyqtaý, óńdeý ónerkásibi, elektrmen jabdyqtaý joǵary ósim kórsetýde. Sondaı-aq, aýyl sharýashylyǵynda da jaqsy ósim baıqalyp otyr.