Qazaqstan ekonomıkasynyń ósimi 2017 jyly 3,3%-ǵa jetýi múmkin - Dúnıejúzilik bank
ASTANA. QazAqparat - Dúnıejúzilik bank sarapshylarynyń boljamynsha, Qazaqstanda JІÓ ósimi 2015-2016 jyldary shamamen 1%-dy qurap, al 2017 jyly 3,3% deıin ósýi múmkin, dep habarlaıdy primeminister.kz.
«Bizdiń bazalyq stsenarıimizge sáıkes, munaı baǵasy 2016 jyly tómen deńgeıde qalyp, 2017 jyly qaıta qalpyna kele bastaıdy. JІÓ ósimi 2015 jáne 2016 jyldary shamamen 1% deńgeıde tómen bolyp qalady, biraq 2017 jyly 3,3 % deıin artýy múmkin», - delingen Dúnıejúzilik bank baıandamasynda.
Sonymen qatar kúrdeli syrtqy orta Qazaqstan damýynyń ortasha merzimdi perspektıvalaryna odan ári áser etedi. Uzaq merzimdi perspektıvada sarapshylar aıtyp ótkendeı: «eldiń syrtqy qaterlerge turaqtylyǵyn arttyrý úshin ekonomıkany ártaraptandyrý qajet».
«Pessımıstik stsenarııde bazalyq stsenarııge qaraǵanda munaı baǵasy 2016 jyly tómendeýin jalǵastyryp, bul Qazaqstan bıýdjeti jaǵdaıynyń jáne tólemdik balansynyń nasharlaýyna jáne ishki suranys pen JІÓ ósiminiń odan ári tómendeýine alyp keledi», - delingen qujatta.
Osylaısha, boljamdarǵa sáıkes, eki jaǵdaıda da munaıdyń ishki óndirisi 2017 jyly Qashaǵanda munaı óndirýdiń arqasynda arta bastaıdy dep kútiledi, sonyń nátıjesinde JІÓ ósimi artyp, memlekettik bıýdjet pen aǵymdaǵy esepshottyń balanstary jaqsarýy múmkin.
«Sondaı-aq Qashaǵanda munaı óndirisin bastaýdyń kidirisi nemese Reseıdegi quldyraýdyń jalǵasýy men Qytaıda ósimniń odan ári tómendeýi yqtımaldyǵyn eskergende, ekonomıkanyń aldynda aıtarlyqtaı tómendeý qaýip-qaterleri bar», - delingen baıandamada.
Oǵan qosa, DB sarapshylary uzaq merzimdi bolashaqta ınstıtýtsıonaldyq reformalardy jáne áleýetti damytý, adamı kapıtaldy qalyptastyrý men ınfraqurylymǵa ınvestıtsııa tartýdy jalǵastyra otyryp, Dúnıejúzilik saýda uıymynyń (DSU) kelisimderin tolyqqandy júzege asyrýdy qosa alǵanda, QR Úkimetiniń qurylymdyq reformalar boıynsha baǵdarlamasynyń tabysty júzege asýy munaıly emes ekonomıkanyń ónimdiligi men básekege qabilettiligin arttyrýy tıis ekenin atap ótti.
Ýaqyt óte kele, bul Qazaqstan damýynyń áldeqaıda turaqty jáne ártaraptandyrylǵan úlgisine negiz bolady dep kútilýde.
