Qazaqstan ekonomıkasy qalypty jaǵdaıda - N. Nazarbaev
ASTANA. 11 qazan. QazAqparat - Qazaqstan ekonomıkasy birqalypty, jaman emes dep aıtýǵa bolady. Búgin Aqordada ótip jatqan Úkimettiń keńeıtilgen otyrysynda Memleket basshysy Nursultan Nazarbaev osylaı aıtty.
«Dúnıejúzinde shynynda da qýantarlyqtaı ekonomıkanyń ósimi oryn alyp otyrǵan joq. Onyń barlyǵy bizge yqpalyn tıgizedi. Degenmen, osy jaǵdaıda Qazaqstannyń jalpy barysy, ekonomıkasy birqalypty jaman emes dep aıtýǵa bolady»,-dedi Prezıdent.
Elbasynyń atap ótýinshe, Úkimettiń osy baǵytta jumys isteı bastaǵanyna ári elimizdiń 2050 jylǵa deıingi strategııasynyń oryndalýy júzege asa bastaǵandyǵyna 1 jyl bolyp otyr. Atalǵan strategııanyń alǵa qoıyp otyrǵan eń mańyzdy maqsaty - Qazaqstannyń 30 órkendep, ósken eldiń arasynan oryn alýy.
«Qıyndyq, árıne Eýropada, Batysta, basqa da elderde bar. Reseı men Qytaı ekonomıkasynyń tómendeýi bizge de yqpalyn tıgizedi. Biraq oǵan qaramaı, olardy aıta bermeı, óz sharýamyzdy tyndyrýymyz kerek», - degen Memleket basshysy myna alasapyran zamanda aldymyzǵa qoıylǵan úlken maqsattardy júzege asyrýda kemshilikterdiń oryn alyp otyrǵandyǵyn ashyq aıtty.
