Qazaqstan ekonomıkasy 2010 jyly joǵary ósim kórsetedi - "Troıka Dıalog" sarapshylary
ALMATY. Qańtardyń 26-sy. QazAqparat /Erbol Azanbek/- Munaı baǵasy barreline 60 dollardan tómendemese, bıylǵy jyly Qazaqstannyń ekonomıkasy 4-5 paıyzdan joǵary ósim kórsetýi tıis.
Búgin Almatyda «Qazaqstan. Strategııa. Qytaıǵa baǵdar ustaý» atty taldaýdy jarııa etken «Troıka Dıalog» kompanııasynyń sarapshylary bıylǵy jylǵa osyndaı boljam aıtty, dep habarlaıdy QazAqparat.
Al baǵa 60 dollardan tómen bolsa, onda ekonomıkalyq ósim bıylǵy deńgeıde bolýy múmkin. Sarapshylar munaı baǵasynyń qandaı deńgeıde bolatynyn naq basyp boljaý qıyn, alaıda biz bıyl 70 dollar kóleminde bolady degen ustanymdamyz, deıdi. Sondyqtan bıylǵy jyly Qazaqstan ekonomıkasynda joǵary ósim bolýy tıis.
«Troıka Dıalog» sarapshylary jalpy alǵanda bıylǵy jyly, sondaı-aq taıaý bolashaqta Qazaqstan ekonomıkasyna teris áser bolmaýy tıis deıdi. Óıtkeni Qazaqstan aldaǵy 10 jylda óndirý kólemin 2 esege ulǵaıtpaq. Sondaı-aq shıkizattyń moldyǵy da buǵan oń áser etedi. «Qazaqstan aýmaǵynda dúnıejúzi halqynyń bar-joǵy 0,2 paıyzy ómir súrse, álemdik shıkizat qorynyń shamamen 3 paıyzy shoǵyrlanǵan. Eldegi paıdaly qazbalar quny shamamen ár adamǵa shaqqanda 300 myń dollarǵa teń. Bul álemdegi eń joǵary kórsetkishterdiń biri: Reseı, Avstrııaǵa qaraǵanda 2 esege kóp», deıdi kompanııanyń aǵa sarapshysy Kıngsmıll Bond. Ol shamadan tys syrtqy qaryz ben Qazaqstannyń turǵyn úı qurylys naryǵynda 2003-2007 jyldary paıda bolǵan «kópirshikter» ekonomıkanyń ósýin tejegenin aıtady. Alaıda, bul jerde taǵy munaı kómekke keledi. Eger munaı baǵasy 60 dollardan quldyramasa, qaryz ben turǵyn úı salasyndaǵy «kópirshik» ekonomıkaǵa qıyn emes. Kompanııanyń taǵy bir sarapshysy Andreı Kýznetsov munaı baǵasynyń qubylmalylyǵy Qazaqstan ekonomıkasy úshin táýekel faktorynyń biri bolyp qala beredi. Bunymen qatar Qazaqstan úshin ekonomıkadaǵy basty táýekeldiń biri geosaıası baǵytta Azııadaǵy daýly aımaqtarǵa jaqyn bolýy. «Alaıda bular jaqyn arada basty qater emes», deıdi sarapshy.
