Qazaqstan ekonomıkasynyń ósim deńgeıi turaqty joǵarylap keledi: JІÓ kórsetkishi 6,5 %-ǵa ósti
ASTANA. KAZINFORM – Eýrazııalyq ekonomıkalyq forým aıasynda Eýrazııalyq turaqtandyrý jáne damytý qorynyń (ETDQ) bas ekonomısti Sergeı Ýlatov óńirdegi ekonomıka úrdisterine baǵa berdi.
Qazaqstan ekonomıkasy iri ınfraqurylymdy qamtıtyn jobalar men ınvestıtsııalar arqasynda belsendi damyp keledi.
Qazaqstan óńirdegi jetekshi ekonomıkanyń biri retinde Eýrazııadaǵy ıntegratsııa men kólik-logıstıka salasyn qalyptastyrýda mańyzdy ról atqarady. Sońǵy bes jylda eýrazııalyq keńistiktegi elder naryqtaǵy jahandyq baılanys transformatsııasy arqasynda damý qarqynyn jedeldetti.
«Eýrazııalyq ekonomıkalyq ıntegratsııa: mindetter men perspektıvalar» paneldik sessııa barysynda ETDQ ókili Qazaqstan ekonomıkasynyń negizgi kórsetkishterin atap ótti:
● 2025 jyly JІÓ kórsetkishi 6,5 %-ǵa ósip, sońǵy kezdegi eń joǵary nátıjelerdiń birine aınaldy.
● 2022–2025 jyldary qurylys salasynyń ortasha jyldyq ósimi 14 %-dan asty.
● Bólshek saýda salasy jyl saıyn orta eseppen 7 %-ǵa ósip otyrdy.
«Ekonomıkalyq ósimniń negizgi draıverleri — munaı óndirý kóleminiń ulǵaıýy, ınfraqurylymnyń damýy jáne qurylys salasynyń belsendiligi. Bul ekonomıkanyń ósý deńgeıiniń saqtalyp otyrǵanyn kórsetedi. Sonymen qatar, ekonomıkanyń qyzyp ketýi jaǵdaıynda ósim sapasy men yqtımal teńgerimsizdikter máselesine erekshe nazar aýdarý qajet», – dedi Sergeı Ýlatov.
Spıkerdiń pikirinshe, EAEO-nyń ıntegratsııa jaǵdaıy dástúrli saýda qatynastar sheńberinen birtindep shyǵyp jatyr. EAEO-ǵa múshe elder tehnologııalyq transformatsııaǵa, aýqymdy tsıfrlandyrýǵa jáne adamı kapıtaldy damytýǵa asa mán berip otyr.
Sergeı Ýlatov 2026 jyldyń 29 qazanynda ETDQ Halyqaralyq ekonomıkalyq konferentsııa ótkizetinin habarlady. Іs-shara turaqty ekonomıkalyq ósimniń áleýeti men faktorlaryn baǵalaýǵa, sondaı-aq Qorǵa múshe memleketterdiń eńbek naryǵyn damytýdaǵy negizgi mindetterin talqylaýǵa aranalady.
Aıta keteıik, buǵan deıin EAEO elderiniń taýar aınalymy 95 mlrd dollarǵa jetkeni habarlandy.
