Qazaqstan ekonomıkasynyń energııa syıymdylyǵy 10%-ǵa tómendeıdi
ASTANA. KAZINFORM — Qazaqstan 2029 jylǵa qaraı ekonomıkanyń energııa syıymdylyǵyn 10%-ǵa tómendetýdi josparlap otyr. Bul týraly QR Ónerkásip jáne qurylys mınıstrligi Ónerkásip komıteti tóraǵasynyń orynbasary Oljas Álibekov Ortalyq kommýnıkatsııalar qyzmetinde ótken baspasóz májilisinde málim etti.
Onyń aıtýynsha, energııany tıimdi paıdalaný kásiporyndardyń shyǵynyn azaıtyp qana qoımaı, jalpy ekonomıkanyń básekege qabilettiligine de áser etedi.
— 2025 jyldyń qorytyndysy boıynsha Qazaqstannyń jalpy ishki óniminiń energııa syıymdylyǵy 2021 jylǵy deńgeımen salystyrǵanda 4%-ǵa tómendegen. Osylaısha, elde belgili bir kólemde ónim óndirýge jumsalatyn energııa birtindep azaıyp jatqanyn baıqaýǵa bolady. Búginde mindet ekonomıkany qajetti energııa resýrstarymen qamtamasyz etýmen ǵana shektelmeıdi. Tutynylǵan árbir resýrsty barynsha tıimdi paıdalaný qajet, — dedi Oljas Álibekov.
Spıkerdiń málimetinshe, Qazaqstanda bul baǵyttaǵy negizgi mindetter 2023–2029 jyldarǵa arnalǵan energııa únemdeý jáne energııa tıimdiligin arttyrý tujyrymdamasynda belgilengen. Qujatqa sáıkes, 2029 jylǵa qaraı ekonomıkanyń energııa syıymdylyǵyn 2021 jylǵy deńgeımen salystyrǵanda 10%-ǵa tómendetý kózdelgen. Ónerkásip salasynda da energııa syıymdylyǵyn 10%-ǵa azaıtý josparlanyp otyr.
— Ol úshin kásiporyndardaǵy energııany kóp qajet etetin jabdyqtardy jańartý, energııa tutyný normatıvterin jetildirý jáne energııa únemdeý jobalaryna qarjy tartý qarastyrylǵan. Qazir Memlekettik energetıkalyq tizilimge 22 myńnan astam kásiporyn men uıym engizilgen. Sonyń ishinde jylyna tutynatyn energııa resýrstarynyń jalpy kólemi keminde 50 myń tonna shartty otynǵa teń iri kásiporyndarǵa erekshe nazar aýdarylatyn bolady, — dedi komıtet tóraǵasynyń orynbasary.
Aıta keteıik, buǵan deıin eldegi 22 myńnan astam kásiporyn men uıymnyń energııa tutynýy baqylanatyny habarlandy.
