Qazaqstan ekonomıkasynyń 2023 jylǵy basty jańalyǵy qandaı – sarapshy pikiri

Ótken jyly Qazaqstan ekonomıkasy energetıkalyq daǵdarys, kúrdeli geosaıası jaǵdaılar jáne jetkizý tizbeginiń úzilýi sekildi birqatar qıyndyqqa tap boldy. Saldarynan jyldyq ınflıatsııa 20 paıyzdan asty. 2023 jyly Ulttyq bank birqatar shara qabyldaýǵa májbúr boldy jáne nátıjesi jaman emes. Ekonomıka sarapshysy Arman Baıǵanov Kazinform tilshisimen suhbatynda Qazaqstan ekonomıkasyndaǵy bıylǵy negizgi ózgerister týraly pikir bildirdi.

Qazaqstan ekonomıkasynyń bıylǵy basty jetistigi – ınflıatsııa qarqynynyń báseńdeýi. Búginde ınflıatsııa deńgeıi 10,3 % qurasa, ótken jyly jyldyq ınflıatsııa deńgeıi 21,3 %-ǵa jetken, – dedi Arman Baıǵanov.

Onyń aıtýynsha, tsıfrlyq valıýtanyń engizilýin de jetistik dep sanaýǵa bolady.

Qazir tsıfrlandyrý belsendi júrip jatyr, bul aqsha-nesıe qatynastaryna jaqsy áser etedi. Bıyl Ulttyq bank tsıfrlyq valıýtany tanystyrdy. Meniń oıymsha, erte me, kesh pe, qazaqstandyqtarǵa tsıfrlyq valıýtany paıdalaný yńǵaılyraq bolady. Bul sybaılas jemqorlyq pen kóleńkeli ekonomıkanyń qarqynyn tómendetedi, – dep atap ótti sarapshy.

Jalpy, ekonomıkadaǵy jetistikterdi onyń ósý qarqynymen baǵalaýǵa bolady.

1 jeltoqsandaǵy ekonomıkalyq ósim 4,9 paıyzdy qurady. Ótken jyly bul kórsetkish 3 paıyzǵa da jetpeıtin. Bul rette jan basyna shaqqandaǵy jalpy ishki ónimniń ortasha ósimi ótken jylmen salystyrǵanda 11 paıyzǵa joǵary, – dep tolyqtyrdy Arman Baıǵanov.

Aıta keteıik, buǵan deıin Halyqaralyq valıýta qory Qazaqstan ekonomıkasynyń ósimin 4,3%-ǵa jetedi degen boljam jasaǵan.