Qazaqstan ekonomıkasyndaǵy kredıttiń 54%-y halyqtyń moınynda

ASTANA. KAZINFORM — Ulttyq banktiń málimeti boınysha, Qazaqstan ekonomıkasyndaǵy keńeıtilgen mándegi kredıttiń jalpy somasy 2024 jyldyń 1 mamyrynan beri 22% ulǵaıyp, 2025 jylǵy 1 mamyrdaǵy jaǵdaı boıynsha 43,7 trln teńgege jetken.

Bul somanyń 46%-y nemese 20,1 trln teńgesi qarjylyq emes zańdy tulǵalar men jeke kásipkerlerdiń bıznes kredıtterine berilgen. Qalǵan 23,6 trln teńge nemese 54%-y — halyqtyń moınyndaǵy kredıtter.

— Ulttyq valıýtadaǵy kredıtter kólemi 39,6 trln teńgeni (90,5%), shetel valıýtasynda — 4,1 trln teńgeni (9,5%) qurady. Bank sektorynyń kredıtteri kredıtterdiń jalpy kóleminiń 85,6%-yna teń, — dep jazylǵan Ulttyq bank málimetinde.

Bul jerdegi keńeıtilgen mándegi ekonomıkaǵa berilgen kredıt uǵymy kredıtter boıynsha naqty bereshektiń qaldyǵy týraly málimetti bildiredi. Oǵan:

• bank sektory (ekinshi deńgeıdegi bankter, «Otbasy banki» AQ jáne «Qazaqstannyń Damý Banki» AQ qosa alǵanda);
• ıpotekalyq uıymdar («Qazaqstandyq turǵyn úı kompanııasy» AQ, «Ekspress Fınans» Ipotekalyq uıymy» AQ);
• kvazımemlekettik sektordyń basqa sýbektileri (naqty sektorǵa kredıt berýdi júzege asyratyn «Báıterek» UBH» AQ-ǵa enshiles «Agrarlyq kredıttik korporatsııa» AQ, «QazAgroQarjy» AQ, «Ónerkásipti damytý qory» AQ, «Qazyna Kapıtal Menedjment» AQ);
• mıkroqarjy qyzmetin júzege asyratyn uıymdar bergen nesıe boryshtary jatqyzylǵan.

Buǵan deıin Qazaqstan halqy mıkroqarjy uıymdaryna 2,9 trln teńge nesıe qaryz ekenin jazǵan edik.