Qazaqstan ekonomıkasyn reformalaýǵa qatysty aýqymdy jumys atqarylyp jatyr - Prezıdent

ASTANA. KAZINFORM – Qazaqstan ekonomıkasyn reformalaýǵa qatysty aýqymdy jumys atqarylyp jatyr. Bul týraly Álemdik jáne dástúrli dinder kóshbasshylary VIII Ceziniń jalpy otyrysynda Memleket basshysy Qasym-Jomart Toqaev aıtty.

– Sońǵy jyldary Qazaqstan ekonomıkasyn reformalaýǵa qatysty aýqymdy jumys atqarylyp jatyr. Men Joldaýda usynǵan josparlar atalǵan bastamany odan ári órbitedi. Bul jerde elimizdiń jańa ındýstrıaldy qalybyn qurý jóninde sóz bolyp otyr. Energetıka jáne kommýnaldyq ınfraqurylym birtindep jańǵyrtyla bastady. Qazaqstan Shyǵys pen Batys, Soltústik pen Ońtústik arasyndaǵy negizgi qurlyq dálizi sanalady. Sondyqtan kólik-tranzıt áleýetimizdi arttyrýǵa aıryqsha kúsh salamyz, - dedi Qasym-Jomart Toqaev.

Prezıdent jańa ınvestıtsııalyq kezeńdi bastaýǵa jáne azamattardyń kásipkerlik bastamalaryn qoldaýǵa erekshe kóńil bólinetindigin aıtty.

- Osy oraıda memleket ınvestıtsııalyq ahýal men iskerlik ortany jetildirýge kiristi. Ulttyq ekonomıkany damytý isinde memlekettiń aýqymdy qarjylyq múmkindigin jumyldyrýmen qatar, iri ınvestıtsııa tartýǵa tyrysamyz. Degenmen bizdiń basty baılyǵymyz – adam. Sol sebepti memleket adam áleýetin nyǵaıtý baǵytynda keshendi shara qabyldady. Ustazdardy, dárigerlerdi, ǵalymdar men ınjenerlerdi, jastardy qoldaý tetikteri jańa deńgeıge kóterildi, - dedi Memleket basshysy.

Qasym-Jomart Toqaev bıyl Qazaqstanda «Jumysshy mamandyqtary jyly» dep jarııalanǵanyn toqtaldy.

- Bul sheshim qoǵamda eńbekqorlyq kýltiniń mańyzdy ekenin kórsetedi. Biz jańa mektepter qurylysyna, joǵary bilim, ǵylym, sport jáne kreatıvti ındýstrııa salalaryn damytýǵa, densaýlyq saqtaý men áleýmettik qamsyzdandyrý júıelerin jańǵyrtýǵa qomaqty qarjy bólip otyrmyz. Qoǵamnyń ekologııalyq mádenıetin arttyrý úshin jan-jaqty sharalar qabyldandy. Byltyr «Taza Qazaqstan» jalpyulttyq aktsııasy bastalyp, oǵan mıllıondaǵan otandasymyz qatysty. Munyń bári Ádiletti, Taza, Qaýipsiz, Qýatty, Tsıfrlyq Qazaqstandy – jaýapkershiligi joǵary azamattardyń memleketin, múmkindikter men progrester elin qurý jolyndaǵy basty baǵdar sanalady, – dedi Memleket basshysy.

Astanada Álemdik dinder kóshbasshylarynyń sezi ótip jatyr.

Іs-shara barysynda Qasym-Jomart Toqaev din basshylaryn beıbitshilik elshileri dep atady.