Qazaqstan ekonomıkasyn bıýdjet esebinen yntalandyryp otyr – Dúnıejúzilik bank

ASTANA. KAZINFORM – Dúnıejúzilik bank Qazaqstan ekonomıkasyna kezekti aılyq sholýyn jarııalady.

«9 aıda jalpy ishki ónimniń jyldyq mándegi shynaıy kólemi 4% ósip, qalpyna keldi. Alǵashqy jarty jyldyqta 3,2%-ǵa deıin baıaýlaǵan bolatyn. Úshinshi toqsanda ǵana ekonomıkalyq ósim jyldyq mánde kenet 5,6% ósti. Ekinshi toqsandaǵy kórsetkish 2,6% bolǵan. Osylaısha ekonomıkanyń ósý qarqyny 5,5% qalpyna keldi. Aldyńǵy toqsanda 1,6% bolyp túsken edi. 

Úshinshi toqsanda pandemııadan keıingi kezeńdegi eń qýatty toqsandyq kórsetkishter tirkelip otyr. Ekonomıka ósiminiń qalpyna kelýine bıýdjet shyǵyndary negizgi qozǵaýshy kúsh bolsa kerek. 9 aıdaǵy shoǵyrlandyrylǵan bıýdjettiń shynaıy shyǵyndary 5,3% ósti», - dep jazylǵan sholýda.

Dúnıejúzilik bank sarapshylarynyń esepteýinshe, eldegi ınvestıtsııalyq belsendilik ózgerissiz qalyp otyr. 

«Taýar eksporty jyldyq mánde 5,9% artyp, ekonomıkalyq belsendilikke báseń bolsa da qoldaý kórsetti. 

Inflıatsııa túsip keledi. Biraq baǵa qysym áli saqtalyp tur. Tutyný baǵalary qyrkúıek aıynda jyldyq mánde 8,3%-ǵa deıin tústi. Qańtarda bul kórsetkish 9,5% bolǵan edi. Bul ishki suranystyń tómendegenin kórsetedi. Aılyq ınflıatsııa da úshinshi aı qatarynan tómendep keledi. Alaıda maqsat etken kórsetkishten áli de joǵary qalyp otyr. 

Azyq-túlik baǵasy 5%-ǵa deıin tússe, azyq-túlik emes taýarlar baǵasy 7,6%-ǵa deıin tómendegen. Al qyzmet kórsetý baǵalary joǵary kúıinde qalyp tur. Buǵan eńbekaqynyń shyn máninde ornyqty ósýimen baılanysty kidirister sebep bolýy yqtımal», - dep jazady Dúnıejúzilik bank mamandary.