Qazaqstan ekonomıkasy jeti aıda 4,1%-ǵa ósti
ASTANA. KAZINFORM — Qazaqstan ekonomıkasy 2026 jyldyń alǵashqy jeti aıynda 4,1%-ǵa ósti. Munaı óndirý tómendegenine qaramastan, ósim óńdeý ónerkásibi, qurylys, kólik, saýda jáne aýyl sharýashylyǵy sııaqty salalardyń esebinen qamtamasyz etildi. Bul týraly Úkimet málim etti.
USB aldyn ala deregine qaraǵanda, 2026 jylǵy qańtar-shildedegi JІÓ-niń ósýi 4,1%. Bul birinshi jartyjyldyqtaǵy kórsetkish deńgeıinde. Munaı óndirýdiń 8,9%-ǵa (53,2 mln tonna) tómendeýine jáne jahandyq naryqtyń qubylmalylyǵyna qaramastan, ósý ornyqtylyǵynda kórinetin oń dınamıkaǵa qol jetkizildi.
Ekonomıkalyq ósý shıkizattyq emes sektor esebinen qoldaý taýyp, UEM-niń esepteýinshe, bıylǵy jeti aıda 5,4%-ǵa ósken. Ekonomıkanyń negizgi segmenti-óńdeý ónerkásibi-9,0% - ǵa joǵary ósý qarqynyn kórsetti. Bul rette mashına jasaý (22%), tamaq ónimderin óndirý (13,9%), hımııa ónerkásibi (26,9%), farmatsevtıka (38,5%), qurylys materıaldary (9,4%), daıyn metall buıymdary (35%) óńdeýdegi ósý qarqyny boıynsha kóshbasshy. Qurylysta (15,3%), kólikte jáne qoımada (7,4%), saýdada (5,9%), aýyl sharýashylyǵynda (5%), baılanysta (4,3%) aıtarlyqtaı ósýge qol jetkizildi.
Aıta ketý kerek, aldyńǵy jyldary ekonomıkanyń ósý qarqyny shıkizat sektorynyń dınamıkasyna qatty táýeldi boldy. Óndirýdiń baıaýlaýy JІÓ-niń ósýin tejese, jedeldeýi, sáıkesinshe, kúshti ósý qarqynyna jol ashty. Ónerkásiptik áleýetti nyǵaıtyp, damý ınstıtýttarynyń rólin kúsheıtý, tranzıttik, avtomobıl jáne temirjol ınfraqurylymyn damytyp, otandyq taýar óndirýshiler men ShOB-ty qoldaý, shıkizattyq emes baǵyttarǵa ınvestıtsııalardy arttyrý arqyly ekonomıkany kezeń-kezeńimen ártaraptandyrý sońǵy jyldary ekonomıkadaǵy munaı sektorynyń rólin aıtarlyqtaı tómendetti (2025 jylǵy qorytyndy boıynsha JІÓ qurylymyndaǵy munaı óndirý úlesi 7,8%-ǵa deıin qysqarǵan).
Aıta keteıik, otandyq óndirýshilerge memlekettik qoldaý kólemi artyp keledi.
