Qazaqstan ekonomıkasy jarty jylda 4,1%-ǵa ósti
ASTANA. KAZINFORM – Bıylǵy birinshi jartyjyldyqtyń qorytyndysy boıynsha Qazaqstan ekonomıkasy 4,1%-ǵa ósip, negizgi serpin munaıǵa táýeldi emes sektorlar esebinen qamtamasyz etildi.
Úkimettiń málimetinshe, naqty sektordaǵy taýar óndirisi 5,1%-ǵa, al qyzmet kórsetý salasy 3,5%-ǵa ulǵaıǵan.
Salalar arasynda eń joǵary ósim qurylys salasynda tirkelip, kórsetkish 15,2%-ǵa jetti. Óńdeý ónerkásibi 9,8%-ǵa, kólik qyzmetteri 7,1%-ǵa ósti. Sonymen qatar saýda (+5,7%), aýyl sharýashylyǵy (+4,4%) jáne baılanys qyzmetteri (+4,3%) oń serpin kórsetti.
– Bıylǵy birinshi jartyjyldyq qorytyndysy boıynsha Qazaqstannyń jalpy ishki ónimi munaıǵa táýeldi emes sektorlardyń ornyqty damýy nátıjesinde 4,1%-ǵa ósti. Atalǵan negizgi salalardyń jıyntyq úlesi respýblıkadaǵy JІÓ ósiminiń shamamen 85%-yn qamtamasyz etti, – delingen Úkimettiń aqparatynda.
Áleýmettik salada da oń ózgerister baıqaldy. Ótken jylǵy tómendeýden keıin halyqtyń naqty tabysy bıylǵy birinshi toqsanda 0,1%-ǵa ósti. Buǵan maýsym aıynda jyldyq ınflıatsııanyń 10,3%-ǵa deıin baıaýlaýy áser etken.
Ekonomıkalyq ósimniń basty draıverleriniń biri ınvestıtsııalyq belsendilik boldy. Birinshi jartyjyldyqta negizgi kapıtalǵa salynǵan ınvestıtsııalar kólemi 9,6%-ǵa artty. Jalpy ınvestıtsııa qurylymyndaǵy jeke kapıtaldyń úlesi 87%-ǵa jetti.
Aqparat jáne baılanys salasyna tartylǵan ınvestıtsııalar 2,3 esege kóbeıse, qurylysqa salynǵan ınvestıtsııalar 38,7%-ǵa, óńdeý ónerkásibine 33,3%-ǵa, aýyl sharýashylyǵyna 24,6%-ǵa, kólik salasyna 11,6%-ǵa ósti.
– Іshki saýda kólemi birinshi jartyjyldyqta 15,3%-ǵa ósip, 36,2 trln teńgege jetti. Qańtar–mamyr aılarynda eldiń syrtqy saýda aınalymy 56,3 mlrd dollardy qurady. Nátıjesinde 4,4 mlrd dollardan asatyn turaqty oń saýda balansy saqtaldy. Sonymen qatar shıkizattyq emes taýarlar men qyzmetter eksporty 14,6%-ǵa ósip, 14,9 mlrd dollarǵa jetti, – dep málim etti Úkimet.
Aıta keteıik, Qazaqstan greenfield-ınvestıtsııa tartýda Ortalyq Azııada kósh bastady.
