Qazaqstan ekonomıkasy 8 aıda 4,1%-ǵa ósti
ASTANA. KAZINFORM — Vıtse-premer-ulttyq ekonomıka mınıstri Serik Jumanǵarınniń tóraǵalyǵymen ótken ekonomıkalyq ósýdi qamtamasyz etý jónindegi shtab otyrysynda eldegi segiz aı ishindegi ekonomıka damýynyń jedel qorytyndysy qaraldy. Bul týraly Úkimet málim etti.
Qazaqstanda JІÓ-niń segiz aıdaǵy naqty ósýi 4,1%. Bul deńgeı úsh aı boıy saqtalyp otyr.
Atap ótkendeı, ekonomıkanyń ósýi, eń aldymen, shıkizattyq emes sektordyń ornyqty dınamıkasymen qamtamasyz etilýde. Óńdeý ónerkásibindegi óndiris kólemi 8,4%-ǵa artty. Mashına jasaý (21,2%), tamaq ónimin óndirý (12,9%), hımııa ónerkási (27,3%), qurylys materıalyn óndirý (7%), daıyn metall buıymy (33,3%), rezeńke jáne plastmassa buıymy (+18,5%), jeńil ónerkásip (+70,4%) jáne farmatsevtıka (38,9%) eń joǵary qarqyndy kórsetti.
Jalpy, ónerkásiptik óndiris 2,6%-ǵa ósti. Qurylysta (15,6%), kólikte jáne qoımada (7,3%), saýdada (6%), aýyl sharýashylyǵynda (5,2%) jáne baılanysta (4,4%) edáýir ósim baıqalady.
Shtab otyrysynda óńdeý ónerkásibiniń negizgi salalaryndaǵy ahýal egjeı-tegjeıli qaraldy.
Metallýrgııada, belgilisi, kásiporyndar búginde 90-100% deńgeıindegi júktememen jumys isteıdi. Osyǵan qaramastan, qara metallýrgııada shoıyn men bolat óndirisin arttyrý arqyly óndiris 2%-ǵa ósken.
Segiz aıda mashına jasaý 21,2%-ǵa ósti. Joǵary dınamıka, onyń ishinde jeńil avtomobıl, avtobýs, júk jáne arnaıy tehnıka óndirisin qamtıtyn avtoónerkásip esebinen (+27,7%) qamtamasyz etildi.
Jyljymaly quram óndirisinde jolaýshylar vagony men platformalar shyǵarylymynyń edáýir ulǵaıýy kezinde jartylaı júk vagondary men lokomotıv óndirisiniń tómendeýi baıqalady. Serik Jumanǵarın tómendeý sebebin egjeı-tegjeıli túsinip, mashına jasaýdyń ósý qarqynyn saqtaý múmkindigin anyqtaý úshin arnaıy jınalys ótkizýdi tapsyrdy.
— Metallýrgııa óńdeý ónerkásibiniń 40%-ynan kóbin qamtıdy. Sondyqtan metallýrgııadaǵy ósý qarqyny óńdeýdiń ósýi úshin erekshe mańyzǵa ıe. Óńdeý salasyndaǵy ekinshi oryndaǵy úlesi boıynsha mashına jasaý dınamıkasyn saqtaý mańyzdy. Bul baǵyt jyl sońyna deıin aıryqsha nazarda bolady, — dep atap ótti Serik Jumanǵarın.
Aýyl sharýashylyǵynda úshinshi aı qatarynan belsendi ósý qarqyny baıqalady: segiz aıda 5,2% (qańtar-shildede 5%, qańtar-maýsymda 4,4%). Mundaı dınamıka jıym-terim naýqanynyń qyzýy men eginniń pisýi sekildi maýsymdyq faktorǵa baılanysty. Azyq-túlik óndirisinde de 12,9% aıtarlyqtaı ósim tirkeldi.
Munaı-gaz salasynda munaı óndirý kóleminiń birtindep qalpyna kelýi baıqalady. Segiz aıdaǵy NKI 91,6%. 2026 jylǵy qańtar-shildede 91,1%, 53,2 mln tonnaǵa qarsy 61,7 mln tonna munaı óndirildi.
2026 jylǵy munaı óndirýdiń túzetilgen boljamy 96 mln tonna. Bul 91,6% NKI-ǵa sáıkes keledi.
Buǵan deıin Qazaqstan sándik kóshet óndirisin damytyp, ımportqa táýeldilikti azaıtatynyn jazdyq.
