Qazaqstan ekonomıkasy 3 aıda 5,8% ósim kórsetti – Ulttyq bank

ASTANA. KAZINFORM — Ulttyq bank tóraǵasy Tımýr Súleımenov bazalyq mólsherlemeni 16,5% deńgeıinde qaldyrý sheshiminiń sebepterin túsindire otyryp, osyndaı málimet aıtty.

— 1-toqsandaǵy jedel málimetterge sáıkes, ekonomıkanyń ósimi 5,8% boldy. Іshki suranyspen baılanysty sektorlar, ıaǵnı kólik, qurylys jáne saýda sektorlary joǵary qarqynmen ósip otyr. Óńdeý jáne taý-ken ónerkásibinde de iskerlik belsendilik artyp keledi. Іshki suranysqa halyq tabysynyń birqalypty ósýi, tutynýshylyq kredıtteý jáne ınvestıtsııalyq jobalardy iske asyrý qoldaý kórsetti, — dedi ol.

Tımýr Súleımenov elde tutynýshylyq suranys 2024 jyldyń kúzindegi deńgeıden birshama báseńdegenin atap ótti.

— 2024 jyldyń sońynda shekten tys ósken tutynýshylyq suranys 2025 jyldyń basynda burynǵy kórsetkishterge qaıta oraldy. Tutynýshylyq suranystyń qalpyna kelýin bólshek saýda aınalymynyń jáne iri satyp alý kórsetkishteriniń aıtarlyqtaı tómendeýinen kórýge bolady. Mysaly, aqpanda bólshek saýda kólemi 5,1%-ke ósti, al ótken jylǵy qazanda ol 19,3%-ke deıin jetken bolatyn. Halyq arasynda ótkizilgen saýalnamaǵa sáıkes sońǵy 3 aıda iri kólemde saýda jasaǵan respondentterdiń úlesi qazandaǵy 27,3%-ten naýryzda 19,9%-ke deıin azaıdy. Qaıtalap aıta keteıin, bul — tutynýshylyq suranys qalypqa túsip kele jatqanynyń belgisi, — dedi Ulttyq bank basshysy.

Aıta keteıik, búgin Ulttyq bank bazalyq mólsherleme týraly jańa sheshim qabyldady.