Qazaqstan ekonomıkalyq erkindik ındeksinde Azııa-Tynyq muhıt aımaǵy boıynsha 12-oryndy ıelendi

Qazaqstan bul reıtıngte 68-shi orynda, al Azııa jáne Tynyq muhıt aımaǵy elderi bóliginde bizdiń el 12-shi orynda.

Reıtıng maqsaty - barlyq múddeli tulǵalarǵa ekonomıkalyq erkindik jaǵdaıyndaǵy jetistikterdi jáne jıyrma jyldaǵy álem elderiniń ıgilikterin baqylaýǵa múmkindik berý. Ekonomıkalyq erkindik ındeksi 1995 jyldan bastap jyl saıyn júrgiziledi.

Ekonomıkalyq erkindik ındeksi ár eldegi erkindiktiń 10 ındıkatoryn esepke alyp júrgiziledi. Bul - bıznes erkindigi, saýda erkindigi, salyq erkindigi, memlekettiń qatysýy (úkimettik shyǵystar), aqsha erkindigi, ınvestıtsııa erkindigi, qarjy erkindigi, menshik quqyqtaryn qorǵaý, sybaılas jemqorlyqtan azat bolý, eńbek qatynastary erkindigi.

Indeks olardyń ekonomıkalyq erkindigi deńgeıine sáıkes dástúrli top-topqa bólingen 186 eldi qamtıdy:

• erkin - 100 - 80 ball kórsetkishpen;
• barynsha erkindik - 79,9 - 70 kórsetkishpen;
• ortasha erkindik - 69,9 - 60 kórsetkishpen;
• barynsha erkin emes - 59,9 -50 kórsetkishpen;
• erkin emes - 49,9 - 0 kórsetkishpen.

Birinshi orynda - 88,6 balmen Gonkong. Bıyl bul eldiń ekonomıkalyq erkindiginiń jalpy kórsetkishi 1.0 tarmaqqa tómendedi, alaıda ol birinshi satyda qalýyna kedergi bolmady. Odan keıingi orynda Sıngapýr, Jańa Zelandııa, Shveıtsarııa, Avstralııa. Bul bes el «Erkin ekonomıka» tobyna endi.

Kelesi «barynsha erkin» tobyn Kanada (6-oryn), Chılı (7), Irlandııa (8), Estonııa (9), Ulybrıtanııa (10 oryn) qamtıdy. Bul topta AQSh 11-orynda. Japonııa 22-shi orynda. Tutastaı, 33 el «Barynsha erkin ekonomıka» tizimine kirdi.

Úshinshi top - «Ortasha erkin ekonomıkamen» elder, munda Qazaqstan kórsetkishin 0.3-tarmaqqa arttyryp, 68-shi orynda. Bizdiń el bul reıtıngte Kýveıt (74-oryn), Frantsııa (75 oryn), Saýd Arabııasy (78 oryn) jáne Túrkııany (79 oryn) basyp ozdy. Tutastaı alǵanda, topta 50 el bar.

Qyrǵyzstan (96-oryn), Mońǵolııa (100-oryn), Úndistan (123-oryn), Tájikstan (149-oryn), Qytaı (144-oryn), Reseı (153-oryn), sondaı-aq taǵy 56 el «barynsha erkin emes» ekonomıka tobyna kirdi.

Belarýs ekonomıkasy erkin emes elder arasynda (157 oryn) bolyp shyqty, Ýkraına bul tizimde 162-shi orynda. Ózbekstan 166-shi oryn, Argentına 167-shi orynda. Túrkimenstan 174-shi orynda, Soltústik Koreıa - 178-shi orynda. Segiz elge sarapshylar sandyq kórsetkish bermegenin atap ótken jón. Bul - Aýǵanstan, Somalı, Irak, Sýdan, Lıvııa, Sırııa, Lıhtenshteın men Iemen.

Tómende Qazaqstan boıynsha jalpy sholý keltirilgen:

1. Ekonomıkalyq erkindiktiń jalpy baǵasy - 63,6 ball (+0,3)

2. Ekonomıkalyq erkindiktiń mártebesi: ortasha erkin

3. Jahandyq reıtıngtegi orny: 68

4. Óńirlik reıtıngtegi orny: 12 (Azııa-Tynyq muhıt aımaǵy)

5. Jetistikter: saýda erkindigi jáne memlekettik qarjyny basqarý

6. Problemalar: múliktik quqyq jáne sybaılas jemqorlyq

7. 2012 jyldan bastap reıtıngtegi ózgeris: ózgerister joq.