Qazaqstan ekonomıkaǵa sheteldik kapıtal salymy boıynsha kóshbasshy elderdiń birine aınalyp otyr - E. Ydyrysov
ASTANA. 19 jeltoqsan. QazAqparat - Sońǵy bes jylda elimizge 100 mlrd. dollardan astam sheteldik ınvestıtsııa tartyldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Syrtqy ister mınıstri Erlan Ydyrysov málim etti.
«Búgingi kúni Qazaqstan ekonomıkaǵa salynǵan sheteldik kapıtal mólsheri boıynsha kóshbasshy elderdiń birine aınalyp otyr. Aıtalyq 2005 jyldan 2013 jyldyń aralyǵynda respýblıkamyzǵa tartylǵan tikeleı sheteldik ınvestıtsııalar aýqymy 173 mıllıard dollardy qurady. Al sońǵy bes jyldyń ózinde tartylǵan sheteldik ınvestıtsııa aýqymy 100 mıllıard dollardan asty», - dedi Syrtqy saıasat vedomstvosynyń basshysy. Onyń aıtýyna qaraǵanda, elimizde qabyldanǵan baǵdarlamalar, sonyń ishinde Údemeli ındýstrııalyq-ınnovatsııalyq damýdyń memlekettik baǵdarlamasy ınvestıtsııa aǵymyna tyń serpin berip otyr. Budan bólek, álemdi sharpyǵan qarjylyq daǵdarys jyldary Qazaqstannyń ınvestıtsııalyq klımaty sheteldik bıznes úshin tartymdy qalpyn saqtap, kapıtal úshin senimdiligin ornyqty ustaǵan.
