Qazaqstan ekonomıka jetistigimen qatar, saıası reformalar júrgizýde - Baıbek ShYU forýmynda
Shanhaı yntymaqtastyq uıymyna múshe memleketterden basqa TMD men BRIKS elderi partııalarynyń ókilderi qatysty. Onyń kún tártibinde bıleýshi partııalardyń pandemııaǵa, koronadaǵdarystyń áleýmettik-ekonomıkalyq saldarlaryna qarsy jáne óńirde kıberqaýipsizdikti qamtamasyz etý boıynsha is-qımylyn úılestirý máseleleri qaraldy.
Baýyrjan Baıbek óz sózinde búginde álem koronavırýs pandemııasynan týyndaǵan jahandyq daǵdarysqa tap bolǵanyn atap ótti. Álemdik ekonomıkanyń ósýi baıaýlap, saýda qatynastary úzilip, geosaıası shıelenis artýda. Osyǵan baılanysty seriktes elderdiń bıleýshi partııalary arasyndaǵy ózara is-qımyl erekshe mańyzdy bolyp otyr.
«Qazaqstan Respýblıkasynyń Tuńǵysh Prezıdenti, «Nur Otan» partııasynyń Lıderi Nursultan Ábishuly Nazarbaev qurylýyna bastamashylardyń biri bolǵan Shanhaı yntymaqtastyq uıymynyń Eýrazııa qurlyǵynyń basym bóliginde naryqty damytý men qaýipsizdikti qamtamasyz etýde áleýeti zor. Júıeli reformalarmen birge ıntegratsııalyq jobalarǵa qatysý, seriktes eldermen saýda-ekonomıkalyq baılanystardy tereńdetý Qazaqstan ekonomıkasynyń damýyna qolaıly áser etti», - dedi ol.
«Nur Otan» partııasy Tóraǵasynyń Birinshi orynbasary Qazaqstannyń ekonomıkadaǵy jetistiktermen qatar saıası reformalardy da júıeli júrgizip kele jatqanyn atap ótti.
«Búginde Qazaqstan Respýblıkasynyń Prezıdenti Qasym-Jomart Kemeluly Toqaevtyń bastamasymen saıası partııalardy tirkeý tártibi aıtarlyqtaı jeńildetildi, parlamenttik oppozıtsııa uǵymy zańnamamen engizildi, partııalardyń saılaýaldy tizimderinde áıelder men jastar úshin mindetti kvotalar belgilendi. Nursultan Ábishuly Nazarbaevtyń 5 ınstıtýtsıonaldyq reformasyn júzege asyrý aıasynda elimizdegi saılaý júıesi tolyǵymen proportsıonaldy qaǵıdatqa kóshti. 2021 jyldyń 10 qańtarynda ótetin Májilis pen barlyq deńgeıdegi jergilikti ókildi organdar saılaýy alǵash ret osy júıe boıynsha ótedi. Bir jyl buryn «Nur Otan» óziniń qaıta jandandyrý baǵdarlamasyn iske qosyp, onyń negizgi elementi jalpyulttyq deńgeıde alǵash ret ótkiziletin praımerız boldy», - dedi Baýyrjan Baıbek.
Onyń aıtýynsha, «Nur Otan» partııasy tek partııalar arasynda ǵana emes, jastar uıymy, zertteý ınstıtýttary men mektepteri sııaqty qurylymdyq bólimsheler arasyndaǵy yntymaqtastyqty tereńdete túsýdi belsendi qoldaı otyryp, halyqaralyq yntymaqtastyqqa úlken mán beredi.
«Qazirgi jahandyq pandemııany eskere otyryp, osy forým aıasynda indet týǵyzýy múmkin juqpaly aýrýlardyń taralýyna qarsy tıimdi sheshimder qabyldaý maqsatynda densaýlyq saqtaý salasyndaǵy ózara is-qımyldy kúsheıtý sııaqty ózekti máselelerdi talqylaý mańyzdy dep sanaımyn. Ekinshiden, qarapaıym adamdardyń múddelerin qorǵaýǵa basa nazar aýdara otyryp, koronadaǵdarystyń áleýmettik-ekonomıkalyq saldarymen kúrestegi partııalarymyzdyń rólin, sondaı-aq, tsıfrlyq senimniń ortaq keńistigin qalyptastyrýǵa qatysty áreketterdi úndestirý jaıyn da qarastyrǵan jón.
Qazaqstan Prezıdenti Qasym-Jomart Kemeluly Toqaev buǵan deıin ShYU-nyń Aqparattyq qaýipsizdik ortalyǵyn qurý ıdeıasyn jarııalaǵan bolatyn. Seriktes elderde ınternet-tehnologııalardyń róli eselep artqanyn eskersek, munyń óńirdegi kıberqaýipsizdikti qamtamasyz etýdiń pármendi quralyna aınalýǵa ábden múmkindigi bar», - dep túıindedi «Nur Otan» partııasy Tóraǵasynyń birinshi orynbasary.
«ShYU+» forýmy barysynda «Edınaıa Rossııa» partııasynyń Tóraǵasy Dmıtrıı Medvedev, ShYU Bas hatshysy Vladımır Norov, Úndistan Respýblıkasynyń Bharatııa Janata Partı Tóraǵasy Nadda Djagata Prakasha, Qytaı Kommýnıstik partııasy Ortalyq Komıtetiniń halyqaralyq bóliminiń meńgerýshisi Sýn Tao jáne basqalary sóz sóıledi.
Eki kúndik forýmnyń sońynda kún tártibi aıasynda partııalardyń odan ári yntymaqtastyǵyn aıqyndaıtyn qorytyndy qujat qabyldanbaq.
