Qazaqstan ekologııalyq ahýaldy jaqsartý úshin ne istep jatyr

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev ekologııalyq ahýaldy jaqsartý úshin qandaı sharalar jasalyp jatqanyn aıtyp berdi, dep habarlaıdy QazAqparat tilshisi.

«Jalpy, ekologııalyq ahýaldy jaqsartý úshin eki jylda kelesideı jumystar atqaryldy: jańa Ekologııalyq kodeks qabyldandy, «Jasyl Qazaqstan» ulttyq jobasy bekitildi. Jaǵymsyz saldardy azaıtý úshin ulttyq zańnamamyzǵa klımattyń ózgerýine beıimdelý normalary engizilgenin erekshe atap ótkim keledi. Sondaı-aq, Óńirlerdiń ekologııalyq máselelerin keshendi sheshý jónindegi jol kartalary bekitildi», - dedi mınıstr Úkimet otyrysynda.

Mınıstrlik pen kásiporyndar arasynda shyǵaryndylardy 20-dan 30 paıyzǵa deıin azaıtýdy kózdeıtin memorandýmdar men jol kartalaryna qol qoıylǵan.

«Biz Jol kartalarynyń 9 aı boıynsha oryndalýyna taldaý júrgizdik. Bul rette, bıyl qarastyrylǵan 95 is-sharanyń 59-y nemese 62 paıyzy oryndaldy. Atap aıtqanda, Atyraý oblysy munaı óńdeý zaýytynda «Týhlaıa balka» toǵan-býlanýyn qalpyna keltirýge kiristik. Mańǵystaý oblysynda «Qoshqar Ata» qaldyq qoımasyn joıý boıynsha qalpyna keltirý jumystary bastaldy.

Jol kartalaryn iske asyrý máselesi turaqty baqylaýda. Oryndalmaý qaýpi bar is-sharalar boıynsha da ákimdikter jumysty kúsheıtýi qajet», - dedi Serikqalı Brekeshev.