Qazaqstan eki salada Italııamen birlesken jobalardy iske asyrady

ASTANA. QazAqparat - Elordada ótip jatqan Táýelsiz ál-aýqat qorlary halyqaralyq forýmynyń 9-shy otyrysy aıasynda «Samuryq-Qazyna» AQ, «Qazagro» ulttyq basqarýshy holdıngi» AQ jáne Italııanyń CDP Equity S.p.A táýelsiz qory yntymaqtastyq týraly aldyn ala kelisimge qol qoıdy, dep habarlaıdy QazAqparat.

«Búgin qol qoıylǵan aldyn ala kelisim basqa elderdegi táýelsiz qorlarmen yntymaqtastyq kókjıegin keńeıtýge jasalǵan taǵy bir qadamǵa aınaldy. Italııalyq CDP Equity qorynyń kompanııalarymen yntymaqtastyq jáne keleshektegi ınvestıtsııalyq jobalardyń júzege asyrylý yqtımaldyǵy Qazaqstan ekonomıkasyna mýltıplıkatıvti yqpalyn tıgizedi: tehnologııalar transfertin jáne halyqty jumyspen qamtýdy qamtamasyz etedi», - dedi «Samuryq-Qazyna» AQ-nyń basqarma tóraǵasy Ómirzaq Shókeev.

Kelisimniń maqsaty -Qordyń, Holdıngtiń qorjyndyq kompanııalary men jetekshi ıtalııalyq kompanııalar arasynda yntymaqtastyqty nyǵaıtý jáne keleshekte Qazaqstan aýmaǵynda ónerkásip jáne aýyl sharýashylyǵy salasynda jańa qýattylyqtardy qurý. CDP Group holdıngisi ónerkásiptiń túrli salalaryndaǵy iri kompanııalardyń aktsııalaryna ıelik etedi. Quptalǵan aldyn ala Kelisimniń birinshi kezeńinde ıtalııalyq tehnologııalardy qoldana otyra óndiristi lokalızatsııalaý múmkindigi qarastyrylǵan.

 «Bul - mańyzdy yntymaqtastyqtyń bastaýy. Ol qos eldiń ekonomıkasyn damytýǵa septigin tıgizedi. Yqpaldastyq týraly aldyn ala kelisimde bizdiń qorjyndyq kompanııalardy damytý maqsatynda uzaqmerzimdi seriktestikke basymdyq beriledi», - dedi ıtalııalyq taraptan aldyn ala kelisimge qol qoıǵan CDP Equity basqarmasynyń tóraǵasy Gýıdo Rıvolta.