Qazaqstan EQDB-ǵa 100% senim arta alady - Alan Pııý

NUR-SULTAN. QazAqparat - QR Premer-Mınıstri Álıhan Smaıylov Eýropa qaıta qurý jáne damý bankiniń vıtse-prezıdenti Alan Pııýmen kezdesti, dep habarlaıdy QazAqparat Úkimettiń resmı saıtyna silteme jasap.

Taraptar EQDB-nyń Qazaqstandaǵy jańa ekonomıkalyq reformalardy júrgizýge qatysý máselelerin, 2023 jylǵa arnalǵan ınvestıtsııalar men ózara is-qımyl josparlaryn, sondaı-aq aldaǵy ýaqyttaǵy yntymaqtastyqtyń basym baǵyttaryn talqylady.

Álıhan Smaıylov 30 jyldyń ishinde EQDB-men birlesip ekonomıkanyń túrli salalarynda $10 mlrd-tan astam somaǵa 300-ge jýyq joba iske asyrylǵanyn atap ótti.

«Qazirgi ýaqytta Úkimet Memleket basshysy belgilegen ekonomıkany sapaly jańǵyrtýǵa baǵyttalǵan aýqymdy reformalar júrgizip jatyr. Nátıjesinde azamattarymyzdyń ál-aýqatynyń aıtarlyqtaı ósýi qamtamasyz etilýi tıis, sondyqtan biz EQDB-nyń osy baǵytqa qatysyp, qoldaý kórsetýin qoldaımyz», — dedi Premer-Mınıstr.

Óz kezeginde Alan Pııý Qazaqstanda qazirgi jobalardy jalǵastyrý jáne jańa jobalardy iske qosý EQDB basymdyqtarynyń biri bolyp tabylatynyn atap ótti.

«Qazaqstan EQDB-ǵa 100% senim arta alady. Sondaı-aq biz elge 2060 jylǵa qaraı ekonomıkany dekarbonızatsııalaýǵa qol jetkizýge kómektesýge múddelimiz. Almaty JEO-2-ni kómirden gazǵa kóshirýdi osy baǵyttaǵy flagmandyq joba dep sanaımyz. Bul – iri jáne mańyzdy joba, biz oǵan qomaqty qarajat salýdy josparlap otyrmyz», — dedi Alan Pııý.

Sonymen qatar ol Banktiń Qazaqstanda jańartylatyn energııa kózderin damytýdy jáne basqa da ınfraqurylymdyq jobalardy qarjylandyrýdy jalǵastyrýǵa daıyn ekenin málimdedi.

«Qazaqstan Úkimeti óz tarapynan kóp is atqarýda, sondyqtan biz áldeqaıda iri jobalardy ázirlep, iske asyrýǵa daıynbyz», — dep atap ótti Alan Pııý.

Kezdesýdi qorytyndylaı kele, Álıhan Smaıylov Úkimettiń Bankpen barlyq baǵyttar boıynsha ózara tıimdi is-qımyldy arttyrýǵa múddeli ekenin aıtty.

Foto: primeminister.kz