Qazaqstan eki jylda jeti álem chempıonatyn ótkizedi

Bıyl qazan aıynda Qazaqstan kúres túrlerinen álem chempıonatyn qabyldaıdy. Al 2027 jyly elimizde olımpıadalyq sport túrleri boıynsha ústel tennısi, dzıýdo, boks, taekvondo, sondaı-aq kıbersport pen short-trekten jasóspirimder arasyndaǵy álem chempıonattary ótedi.

– Táýelsiz Qazaqstan tarıhynda alǵash ret elimiz eki jyl ishinde jeti álem chempıonatyn ótkizý quqyǵyna ıe boldy. Bul – Qazaqstannyń sport ınfraqurylymy men uıymdastyrýshy áleýetiniń joǵary deńgeıde ekenin aıǵaqtaıtyn mańyzdy jetistik. Sonymen qatar bul álemdik sport qaýymdastyǵy aldyndaǵy zor jaýapkershilikti de bildiredi, – delingen habarlamada.

2027 jyly álem chempıonattarynyń barlyǵy Astana qalasynda uıymdastyrylady. Atap aıtqanda, short-trekten jasóspirimder arasyndaǵy álem chempıonaty 28-31 qańtar aralyǵynda, bokstan álem chempıonaty 10-26 sáýirde, ústel tennısinen álem chempıonaty 22-30 mamyrda ótedi.

Sondaı-aq dzıýdodan álem chempıonaty 7-14 maýsymda, taekvondodan álem chempıonaty 7-13 shilde kúnderi uıymdastyrylady. Kıbersporttan álem chempıonatynyń naqty merzimi keıinirek jarııalanady.

Vedomstvo málimetinshe, elimizde iri halyqaralyq sport jarystaryn ótkizý – Memleket basshysynyń sportty damytý, eldiń halyqaralyq bedelin nyǵaıtý jáne Qazaqstandy óńirdegi jetekshi sport ortalyqtarynyń birine aınaldyrý jónindegi tapsyrmalaryn júıeli iske asyrýdyń nátıjesi.

Álem chempıonattaryna dúnıejúziniń eń úzdik sportshylary qatysady dep josparlanyp otyr. Mundaı aýqymdy jarystar otandyq sporttyń damýyna serpin berip, salamatty ómir saltyn nasıhattaýǵa jáne jastardyń sportqa qyzyǵýshylyǵyn arttyrýǵa yqpal etedi.

Sonymen qatar halyqaralyq dodalar oqıǵalyq týrızmniń damýyna, qonaqúı bıznesiniń jandanýyna, qyzmet kórsetý salasy men ınfraqurylymnyń damýyna oń áserin tıgizedi.

Aıta keteıik, Qazaqstan qyzdar quramasy voleıboldan Azııa chempıonatyn altynshy orynmen aıaqtady.