Qazaqstan EYDU-nyń qoǵamdyq adaldyq jónindegi usynymyna qosyldy
ASTANA. KAZINFORM – Ekonomıkalyq yntymaqtastyq jáne damý uıymy (EYDU) Qazaqstannyń EYDU-nyń Qoǵamdyq adaldyq jónindegi usynymyna (OECD Recommendation on Public Integrity) qosylǵanyn resmı túrde rastady. Bul týraly tıisti hatty EYDU Bas hatshysy Mattıas Kormann Memlekettik qyzmet isteri agenttiginiń tóraǵasynyń atyna joldady.
Atalǵan sheshim EYDU-nyń Qazaqstandaǵy qoǵamdyq adaldyq júıesi men onyń iske asyrylý tetikterine júrgizgen keshendi sholýynyń qorytyndylary jáne uıym aıasyndaǵy barlyq rásimderdiń tolyq aıaqtalýy negizinde qabyldandy. Qabyldanǵan sheshim Qazaqstannyń adaldyq jáne sybaılas jemqorlyqqa qarsy saıasat salasynda EYDU standarttaryn engizý jónindegi mindettemelerdi qabyldaǵanyn rastaıdy.
- EYDU-nyń Qoǵamdyq adaldyq jónindegi usynymy – memlekettik basqarý júıesinde adaldyq mádenıetin qalyptastyrýǵa jáne sybaılas jemqorlyqqa qarsy is-qımyldyń zamanaýı tásilderin ornyqtyrýǵa baǵyttalǵan negizgi halyqaralyq qujattardyń biri. Qujat 13 qaǵıdatqa negizdelgen jáne memlekettik apparattyń barlyq deńgeıinde, sondaı-aq tutastaı qoǵamda adaldyqty qamtamasyz etýdiń júıeli, táýekelge baǵdarlanǵan ári konteksti eskeretin tásilderin iske asyrýdy kózdeıdi. Bul qadam Memleket basshysy Qasym-Jomart Kemeluly Toqaevtyń bastamasymen júzege asyrylyp jatqan kásibı, esep beretin jáne azamattarǵa baǵdarlanǵan memlekettik apparatty qalyptastyrý jónindegi reformalardyń mańyzdy kezeńi sanalady, - dep atap ótedi agenttiktiń baspasóz qyzmetinen.
Qazaqstannyń EYDU usynymyna qosylýy halyqaralyq standarttarǵa ári «Ádiletti Qazaqstan» qaǵıdattaryna saı ózgeristerdiń oryn alyp jatqanyn rastaıdy.
Memlekettik qyzmet isteri agenttigi atalǵan usynymǵa qosylýdy memlekettik qyzmet júıesin odan ári jetildirýdiń, ádep standarttaryn kúsheıtýdiń, sybaılas jemqorlyqqa qarsy tetikterdi damytý men azamattardyń memlekettik ınstıtýttarǵa degen senimin odan ári arttyrýdyń tıimdi quraly retinde qarastyrady.
Agenttik aldaǵy ýaqytta da Memleket basshysynyń memlekettik basqarý júıesine ozyq halyqaralyq tájirıbelerdi engizý jáne sybaılas jemqorlyqqa múldem tózbeýshilik mádenıetin qalyptastyrý jónindegi tapsyrmalaryn turaqty túrde iske asyrýdy jalǵastyrady.
Buǵan deıin memlekettik qyzmette tsıfrlandyrý men kadrlyq irikteýdiń jańa kezeńi bastalǵanyn jazǵan edik.