Qazaqstan EYDU alańynda jasyl ekonomıka men kómirtegi beıtaraptyǵy strategııasyn tanystyrdy
ASTANA. KAZINFORM - 2026 jylǵy 15-16 maýsym kúnderi – Qazaqstan Respýblıkasy delegatsııasy Parıj qalasynda ótken Ekonomıkalyq yntymaqtastyq jáne damý uıymynyń (EYDU) «Jasyl» is-qımyldar jónindegi arnaıy jumys tobynyń (Green Action Task Force, GATF) otyrystaryna qatysty.
QR Ekologııa jáne tabıǵı resýrstar mınıstrligi baspasóz qyzmetiniń habarlaýynsha, delegatsııa quramyna QR Ekologııa jáne tabıǵı resýrstar mınıstrliginiń Klımattyq saıasat departamentiniń dırektory Sáýle Sabıeva, QR Ulttyq ekonomıka mınıstrliginiń Halyqaralyq ekonomıkalyq yntymaqtastyq departamentiniń dırektory Erjan Nesibqulov, sondaı-aq «Astana» halyqaralyq qarjy ortalyǵy men Qazaqstan Respýblıkasynyń Parıjdegi halyqaralyq uıymdar janyndaǵy Turaqty ókildiginiń ókilderi kirdi.
GATF Ortalyq Azııa men Shyǵys Eýropa elderinde «jasyl» saıasatty ilgeriletýge arnalǵan halyqaralyq alań bolyp tabylady.
Otyrystar barysynda Qazaqstan ókilderi 2026 jylǵy 22–24 sáýir aralyǵynda Astana qalasynda ótken Óńirlik ekologııalyq sammıttiń nátıjeleri týraly aqparat usynyp, atalǵan sammıtti ótkizýge qosqan mazmundy úlesi úshin EYDU-ǵa taǵy da alǵys bildirdi.
Sáýle Sabıeva Shyǵys Eýropa, Kavkaz jáne Ortalyq Azııa elderindegi jasyl ekonomıkany josparlaý máselelerine arnalǵan dóńgelek ústelde sóz sóıledi. Ol óz baıandamasynda Qazaqstandaǵy jasyl ekonomıkaǵa kóshý tujyrymdamasy men kómirtegi beıtaraptyǵyna qol jetkizý strategııasyn iske asyrýdyń qazirgi jaı-kúıi men negizgi basymdyqtary týraly aqparat berdi.
Ortalyq Azııadaǵy turaqty ınfraqurylymdy damytý jónindegi sharalardy iske asyrý máselesin talqylaý aıasynda Erjan Nesibqulov Qazaqstanda Sustainable Infrastructure Programme in Asia (SIPA) baǵdarlamasyn iske asyrý tájirıbesimen bólisti.
Atap aıtqanda, SIPA baǵdarlamasy komandasynyń qoldaýymen Qazaqstannyń 2060 jylǵa deıingi tómen kómirtekti damý strategııasynyń jobasyn ázirleý, eldiń ınvestıtsııalyq saıasatyn, ásirese «jasyl» jobalarǵa ınvestıtsııalar tartý tetikterin jetildirý jónindegi sharalardy ázirleý jumystary týraly aıtyp, SIPA baǵdarlamasyn Qazaqstanda odan ári jalǵastyrýǵa múddelilik bildirdi.
Talqylaýlar barysynda sý sektoryna erekshe nazar aýdaryldy. Bul baǵyt Ulttyq is-qımyl josparynyń basym baǵyttarynyń biri retinde aıqyndalǵan. Qazaqstan tarapy osy saladaǵy sharalardy ázirleý men iske asyrý máseleleri boıynsha tájirıbe almasýǵa, sondaı-aq sý sektoryn turaqty damýdyń negizgi basymdyqtarynyń biri retinde tańdaýǵa qatysty halyqaralyq tájirıbeni zerdeleýge qyzyǵýshylyq tanytatynyn atap ótti.
Otyrys qorytyndysy boıynsha QR Ekologııa jáne tabıǵı resýrstar vıtse-mınıstri Mansur Oshýrbaev 2027–2028 jyldarǵa arnalǵan GATF bıýrosy tóraǵasynyń orynbasary bolyp saılandy.
Іs-shara aıasynda Qazaqstan ókilderi birqatar ekijaqty kezdesýler ótkizdi. Atap aıtqanda, EYDU Damý ortalyǵynyń jáne Eýrazııalyq básekege qabilettilik baǵdarlamasynyń basshylyǵymen kezdesýler uıymdastyrylyp, olardyń barysynda odan ári yntymaqtastyq perspektıvalary, birlesken jobalardy iske asyrý jáne ózara is-qımyldyń basym baǵyttary talqylandy.
Osyǵan deıin MEamleket basshysy ekologııalyq mádenıet pen qoǵamdyq tártip qatar damýy kerektigin aıtqan bolatyn.
