Qazaqstan EYDU alańynda sybaılas jemqorlyqqa qarsy reforma nátıjelerin tanystyrdy
ASTANA. KAZINFORM – Búgin Parıjde (Frantsııa) Ekonomıkalyq yntymaqtastyq jáne damý uıymynyń adaldyq jáne sybaılas jemqorlyqqa qarsy is-qımyl máseleleri jónindegi jumys tobynyń úshinshi otyrysy jumysyn bastady. Eki kúndik is-sharaǵa Memlekettik qyzmet isteri agenttiginiń tóraǵasy Darhan Jazyqbaı qatysty.
Agenttik tóraǵasy baıandamasynda EYDU-ǵa 17 jyldyq yntymaqtastyǵy úshin alǵysyn bildire otyryp, «EYDU-nyń Qazaqstandaǵy qoǵamdyq adaldyq jónindegi sholýy» jarııalanýyn osy yntymaqtastyqtyń mańyzdy nátıjesi ekenin aıtty. Bul qujat sybaılas jemqorlyqqa qarsy tetikterdiń turaqtylyǵyn baǵalaıdy jáne 2022-2026 jyldarǵa arnalǵan Sybaılas jemqorlyqqa qarsy saıasat tujyrymdamasyn iske asyrýdaǵy mańyzdy kezeń sanalady.
- Biz qundylyqtar júıesin formaldy oryndaýshylyqtan sanaly qyzmet etýge kóshirip jatyrmyz, – dedi Darhan Jazyqbaı.
Agenttik tóraǵasy Qazaqstan Prezıdenti Qasym-Jomart Toqaevtyń memlekettik basqarý mádenıetin ózgertý baǵytyna bastama kótergenin atap ótti. Bul jumystyń negizgi elementi – barlyq deńgeıde adaldyq júıesin qalyptastyrý. Mektepterde «Adal azamat» baǵdarlamasy engizilip jatyr, joǵary oqý oryndarynda akademııalyq adaldyq modýlderi oqytylady. Al memlekettik qyzmetshiler úshin ádep jáne sybaılas jemqorlyqqa qarsy is-qımyl boıynsha úzdiksiz oqytý mindetti negizde júzege asyrylady.
Adaldyq qaǵıdattaryn damytý memlekettik basqarýdyń tehnologııalyq jańǵyrýymen qatar júrýde.
Prezıdent Qasym-Jomart Toqaev Qazaqstan halqyna Joldaýynda tsıfrlyq progrestiń jańa kezeńine kóshýdi aıqyndady. Aldaǵy úsh jylda el ıntellektýaldyq, tehnologııalyq jáne ınstıtýtsıonaldyq turǵydan barlyq salalarda jańǵyrýdy qamtamasyz etip, tsıfrlyq transformatsııanyń jańa sapaly deńgeıine shyǵýy tıis. Bul baǵyt memlekettik basqarýdyń ashyqtyǵyn arttyrýmen jáne sybaılas jemqorlyq táýekelderin tómendetýmen tikeleı baılanysty.
Tsıfrlandyrý adamı faktordy boldyrmaýǵa jáne sybaılas jemqorlyq táýekelderin barynsha azaıtýǵa múmkindik beretin mańyzdy quralǵa aınaldy. Búginde memlekettik qyzmetke qabyldaý protsesinde tsıfrlyq irikteý júıesi jumys istep jatyr, ol úmitkerlerge teń múmkindik beredi. Myńdaǵan vedomstvolyq uıymdar men bilim berý mekemelerin qamtıtyn Biryńǵaı kadr júıesi qurylyp, avtomattandyrylǵan. Bul eńbekke qabyldaý kezinde múddeler qaqtyǵysyn eńserý men táýekelderdi azaıtýdyń mańyzdy tetigi sanalady.
Sondaı-aq, Ortalyq Azııada alǵash ret memlekettik qyzmetshilerdi jasandy ıntellekt daǵdylaryna oqytýǵa arnalǵan AI Qyzmet baǵdarlamasy iske qosyldy.
Agenttik 2025 jylǵy jeltoqsanda Parlamentke engiziletin «Memlekettik qyzmet týraly» jańa zań jobasyn daıyndady. Zań jobasynda adamǵa baǵdarlaný jáne memlekettik qyzmetshiniń minsiz bedeli qaǵıdattary bekitiledi.
- Qazaqstan sybaılas jemqorlyqtyń saldarymen kúresýden onyń sebepterin aldyn alýǵa baǵyttalǵan júıeli transformatsııa jolyna tústi, – dep atap ótti agenttik tóraǵasy.
Baıandamada atap ótilgendeı, Qazaqstan EYDU Keńesiniń qoǵamdyq adaldyq jónindegi usynymyna qosylýǵa múddelilik tanytyp otyr. Bul bizdiń respýblıkamyzdyń BUU, EYDU jáne GREKO ustanymdary men halyqaralyq standarttaryn qoldaıtynyn aıǵaqtaıdy.
- Qazaqstan men EYDU arasyndaǵy yntymaqtastyq ádildik pen senim sııaqty ortaq qundylyqtardy ilgeriletýdiń berik negizi bolyp qala bermek, – dep túıindedi sózin Darhan Jazyqbaı.
Osyǵan deıin Darhan Jazyqbaı memlekettik qyzmet salasynda júzege asyrylatyn jańalyqtar týraly aıtqan bolatyn.