Qazaqstan egin alqaptarynyń aýmaǵy boıynsha álemde altynshy orynda tur — Prezıdent
ASTANA. KAZINFORM — Qazaqstan-Túrkııa bıznes forýmynda Qasym-Jomart Toqaev agroónerkásip jáne aýyl sharýashylyǵy salasyndaǵy yntymaqtastyqty kúsheıtý qajet ekenin málimdedi. Bul týraly Aqorda jazdy.
— Qazaqstan egin alqaptarynyń aýmaǵy boıynsha álemde altynshy orynda tur. Sondaı-aq elimiz astyq eksporttaıtyn eń iri on memlekettiń qataryna kiredi. Byltyr dıqandarymyz 27 mıllıon tonna astyq jınady. Sońǵy bes jylda aýyl sharýashylyǵy ónimderiniń eksporty 1,8 ese ósti. Osylaısha, Qazaqstan Global Food Security ındeksi boıynsha 32-shi orynda tur. Byltyr eki el arasyndaǵy aýyl sharýashylyǵy ónimderiniń alys-berisi 25 paıyzǵa artty. Alaıda, elderimizdiń bul saladaǵy áleýeti zor. Mysaly, Tiryaki Holding kompanııasy Astanada bıdaı men burshaqty tereń óńdeıtin zaýyt salmaqshy. Sondaı-aq İskefe Holding kásiporny jelatın óndirisin qolǵa almaq. Alarko Holding kompanııasy Shymkentte jylyjaı keshenin salýdy josparlap otyr. Osy jobalardyń barlyǵy óńdeý ónerkásibin órkendetip, eksporttyq áleýetimizdi arttyrýǵa septigin tıgizedi dep senemin. Budan bólek, biz zamanaýı agrotehnologııany engizýge, sýarý júıesin damytýǵa erekshe mán berip otyrmyz. Sondaı-aq veterınarııa jáne fıtosanıtarııa salalarynda birlese jumys isteýge nıettimiz. Óz tarapymyzdan Túrkııaǵa «halal» standartyna saı keletin et ónimderin eksporttaýǵa daıynbyz, — dedi Prezıdent.
Aıta keteıik, Qasym-Jomart Toqaev pen Rejep Taııp Erdoǵan Qazaqstan-Túrkııa bıznes forýmyna qatysty. Memleket basshysy bul forýmnyń eki el úshin tıimdi ári mazmundy bolǵanyn atap ótip, alqaly jıyndy uıymdastyrýǵa atsalysqan Túrkııa tarapyna alǵys aıtty. Prezıdent Qazaqstanda túrik kompanııalaryna jan-jaqty qoldaý kórsetilip jatqanyna toqtaldy.
