Qazaqstan egemendigin aqylmen, bilimmen aldy - Jıgýlı Daırabaev
Qazaqstan egemendigin aqylmen, bilimmen aldy. Májilis depýtaty Jıgýlı Daırabaev osyndaı pikirdi bildirdi, dep habarlaıdy Kazinform.
«Bul kún – qazaq halqy úshin úlken tarıhı oqıǵa bolǵan kún, ata-babalarymyz san ǵasyr boıy ańsap kelgen egemendigimizge qol jetkizgen kún. Esterińizde bolsa, 1990 jyly 25 qazanda biz áli de Keńes odaǵynyń quramynda edik. Al sol kúni Joǵarǵy keńestiń 12-shaqyrylymynyń 360 depýtaty egemendigimizdi jarııa etti. Iá, memleket quraýshy – qazaq halqy. Biraq, sol kezde Joǵarǵy keńestegi qazaq ókilderiniń sany az boldy. Jańylmasam, Joǵarǵy keńestegi depýtattardyń 65 paıyzy basqa ulttyń ókilderi edi. Babalarymyz búkil álemde 9-oryn alatyn jerimizge naızanyń ushymen, bilektiń kúshimen ıelik etse, biz Qazaqstannyń egemendigin aqylmen, bilimmen, parasatpen aldyq. Salyq Zımanov, Sultan Sartaev, Saýyq Tákejanov, Erik Asanbaev, Serikbolsyn Ábdildın, Sherhan Murtaza syndy qazaqtyń birtýar azamaty egemendigimizdi jarııalaýǵa at salysty», - dedi Májilis depýtaty agenttik tilshisine bergen pikirinde.
Osy oraıda májilismen taıtalaspen, atys-shabyspen, qantógispen keletin táýelsizdiktiń de bar ekendigin basa aıtty.
«Sondyqtan qazaq memleketiniń táýelsizdigin kózdiń qarashyǵyndaı saqtaýymyz kerek. Keler urpaq eldiń egemendigin, táýelsizdigin qadirleýi, qasterleýi tıis. Tarıhqa zor qurmetpen qaraýy qajet. Memleketimizdiń bolashaǵy zor. Áleýmettik-ekonomıkalyq áleýeti artqan memleketke aınalamyz. Oǵan barlyq múmkindigimiz bar», - dedi Jıgýlı Daırabaev.
Aıta keteıik, 25 qazan – elimiz úshin Qazaqstan tarıhyndaǵy eń mańyzdy datalardyń biri. 1990 jyldyń dál osy kúni Qazaq KSR-niń Memlekettik egemendigi týraly deklaratsııa qabyldanǵan bolatyn. Shyndyǵynda, bul elimizdiń táýelsizdik jolyndaǵy alǵashqy qadamy edi.
