Qazaqstan EEK pen Úkimetaralyq komıssııa alańynda Qazaqstan-Reseı shekarasyndaǵy keptelis máselesin kóterdi

ASTANA. KAZINFORM – Vıtse-premer – Ulttyq ekonomıka mınıstri Serik Jumanǵarın memlekettik organdar, Shekara qyzmeti, Syrtqy ister mınıstrligi, ІІM Kóshi-qon qyzmeti komıteti basshylarynyń, shekara mańy óńirleri ákimderi orynbasarlarynyń jáne Parlament Májilisi depýtatynyń qatysýymen jedel keńes ótkizdi. Bul týraly Úkimettiń baspasóz qyzmeti habarlady.

Jıyn taqyryby – Reseı Federatsııasyna kirý kezindegi ótkizý pýnktterinde júk kólikteriniń turyp qalýy men Reseı Federatsııasynyń kóshi-qon zańnamasynyń jańa normalarynyń qoldanylýyna baılanysty júrgizýshilerdiń shaǵymy.

2025 jylǵy 1 qańtardan bastap Reseıde zań kúshine endi. Oǵan sáıkes sheteldik azamattar kirý jáne shyǵý sanyna qaramastan kúntizbelik jyl ishinde 90 kúnnen aspaıtyn merzimde tirkeýsiz Reseı Federatsııasynyń aýmaǵynda bola alady. Buryn bul merzim bir jyl ishinde 180 kún bolǵan. Bul shekteý halyqaralyq júk pen jolaýshy tasymalyn júzege asyratyn júrgizýshilerge de qoldanylady. Sonymen qatar Reseı men Belarýs aýmaǵynda bolý jalpy esepke alynady. Óıtkeni bul elder odaqtas memleket. Osylaısha, júrgizýshiniń Belarýste bolýy Reseıde bolý retinde esepteledi. Sóıtip, ruqsat etilgen merzim edáýir qysqarmaq.

Bul norma Qazaqstan, Armenııa, Ázerbaıjan, Qyrǵyzstan, Ózbekstan men basqalardy qosqanda, vızasyz elderdiń birazyna qoldanylady. Sonymen qatar UQK Shekara qyzmetinde naqtylanǵandaı, eger sheteldik azamat turýǵa yqtııarhat, ruqsat nemese ýaqytsha turýǵa ótinish sııaqty ruqsat qujatyn rásimdegen bolsa, bolý merzimi esepke alynbaıdy. Mundaı jaǵdaıda shekteý toqtatylady.

Qazaqstanda sheteldik azamattardyń osyǵan uqsas tirkeýsiz bolý talaby alty aı ishinde 90 kún. Ol halyqaralyq júk jáne avtobýs reısin oryndaıtyn júrgizýshilerge qoldanylmaıdy. Bul halyqaralyq tájirıbege sáıkes keledi.

Osy jylǵy qyrkúıekten bastap Reseı tarapynan sur ımportty anyqtaý boıynsha júrgizip jatqan reıd jaǵdaıdy ýshyqtyrǵan. Qosymsha tekserýdiń kesirinen keıbir ótkizý pýnktterinde júk kóligin tekserý ýaqyty artty.

Májilis depýtaty Bolatbek Nájimetdınuly kóshi-qon zańnamasynyń jańa erejeleriniń qoldanysyna is júzinde halyqaralyq tasymaldaýshylar ǵana emes, EAEO elderiniń ishinde jumys isteıtin júrgizýshiler de kirgenin atap ótti. Olardyń kópshiliginde Reseı Federatsııasynda bolý shegi taýsylyp, reıske qaıta shyǵý úshin jańa jyldyń bastalýyn kútýge májbúr.

Belgilengen 90 kúndik shektik mejeden asqan keıbireýler ustaldy jáne kóshi-qon zańnamasynyń jańa normalaryn buzýǵa baılanysty elden ketý qajettiligi týraly habarlama aldy.

Qazaqstandyq tarap reseılik áriptesterimen túrli deńgeıde kelissóz júrgizip jatyr.

7 qazanda Serik Jumanǵarın bul máseleni Reseı Federatsııasynyń Qazaqstandaǵy Tótenshe jáne Ókiletti Elshisi Alekseı Borodavkınmen kezdesýde atap ótti. Eki tarap týyndaǵan qıyndyqty birlesip jáne jedel retteýge daıyn ekendigin bildirdi.

EEK-ke qalyptasqan jaǵdaıdy syrtqy saýdaǵa kedergi keltiretin tosqaýyl dep taný týraly resmı ótinish joldandy. Bul másele 13 qazanda EEK alańynda jáne 7 qarashada Qazaqstan men Reseı arasyndaǵy yntymaqtastyq jónindegi Úkimetaralyq komıssııanyń 26-otyrysynda qaralady.

Aıta keteıik, Qazaqstannyń Reseımen shekarasynda 30 avtokólik ótkizý pýnkti jumys isteıdi. 2024 jyly ótkizý pýnktteri arqyly 14,3 mln adam, 3 mln jeńil jáne 2 mln júk avtokóligi ótken. Júk kóligine arnalǵan eń iri ótkizý pýnktteri — Syrym, Qaıraq, Jaısań, Qosaq, Aýyl, Qurmanǵazy jáne Jańajol.

Qazaqstan men Reseı shekarasyndaǵy ótkizý beketterinde kólikter jınalyp qalǵanyn jazǵan bolatynbyz.