Qazaqstan EDYU jańa jobasyna qatysý jóninde bastama kóterdi
Birinshi vıtse-mınıstr búgin QR Parlamenti Senaty Qarjy jáne bıýdjet komıtetiniń keńeıtilgen otyrysynda Salyqtyq bazany búrkemeleýge jáne paıdany salyq salý aıasynan alyp ketýge qarsy is-qımyl maqsatynda salyqtyq kelisimderge qatysty sharalardy oryndaý jónindegi kópjaqty konventsııany ratıfıkatsııalaý týraly Qazaqstan Respýblıkasy zańynyń jobasyn tanystyrǵan bolatyn.
«QR Tuńǵysh Prezıdenti «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna joldaýynda Ekonomıkalyq damý jáne yntymaqtastyq uıymynyń úzdik tájirıbelerin engizý qajettiligin atap ótti. Atalǵan tapsyrmany negizge ala otyryp QR Qarjy mınıstrligi salyqtardy tóleýden jaltarýǵa qarsy kúreske baǵyttalǵan Ekonomıkalyq damý jáne yntymaqtastyq uıymynyń jańa jobasy – BEPS-ke Qazaqstannyń qatysýyna bastama jasady. Búgin sizderdiń qaraýlaryńyzǵa Salyqtyq bazany búrkemeleýge jáne paıdany salyq salý aıasynan alyp ketýge qarsy is-qımyl maqsatynda salyqtyq kelisimderge qatysty sharalardy oryndaý jónindegi kópjaqty konventsııany ratıfıkatsııalaý týraly Qazaqstan Respýblıkasy zańynyń jobasy usynylady. Osy halyqaralyq shartqa qosylýdyń mańyzy men qajettiligin atap ótkim keledi, óıtkeni bul - Eýropalyq odaqtyń dırektıvasyna sáıkes BEPS jobasynyń barlyq qatysýshylary úshin mindetti shart», - dedi ol.
Birinshi vıtse-mınıstrdiń aıtýynsha, bul konventsııa barlyq ekijaqty salyqtyq konventsııalarǵa salyq salýdan jaltarýǵa qarsy is-qımylǵa baǵyttalǵan ózgerister engizedi. Bul rette kópjaqty konventsııanyń máni tek eki tarapy da kópjaqty konventsııaǵa qosylǵan ekijaqty salyqtyq konventsııalar ǵana bolady.
«Kópjaqty konventsııada kózdelgen negizgi ózgeristerge toqtal ótkim keledi. Birinshiden, zańdy tulǵalardyń qos rezıdenttik máselesin sheshý tártibi aıtylǵan. Ekinshiden, kirispe mátini eki memlekette de, atap aıtqanda kiris kózi bolatyn memlekette jáne kiris alýshynyń rezıdenttigi bolatyn memlekette kiristerdi salyq salýdan bosatý múmkindigin boldyrmaý bóliginde tolyqtyryldy. Úshinshiden, eger mámileniń maqsaty tek osyndaı jeńildikterdi alý bolǵan jaǵdaıda jeńildikterdi qoldanýdy shekteıtin ereje kózdelgen. Tórtinshiden, dıvıdendter boıynsha kiris týyndaǵanǵa deıin bir jyl ishinde jeńildikterdi alý úshin belgilengen sharttardyń sáıkes bolý qajettiligi týraly talap belgilendi: Besinshiden, kelisimsharttardy bólý, agenttik/komıssııalyq kelisimderdi, jekelegen qyzmet túrleri úshin arnaıy erekshelikterdi paıdalaný esebinen turaqty ókildik mártebesin zańsyz boldyrmaýdyń jolyn kesýge baǵyttalǵan erejeler engizildi. Altynshydan, ózara kelisiletin rásimge bastama jasaý úshin naqty merzimder belgileı otyryp, ózara kelisim rásimi jetildirildi», - dedi Berik Sholpanqulov.
Atalǵan komıtet músheleri zań jobasyna qoldaý bildirdi. Endi bul qujat Senattyń jalpy otyrysynda talqyǵa túsetin bolady. Jalpy otyrysta bul másele boıynsha QR Premer-Mınıstriniń birinshi orynbasary - Qarjy mınıstri Álıhan Smaıylov baıandama jasaıdy.
