Qazaqstan ECI-de 55-orynǵa kóterildi: sarapshylar ne deıdi
ASTANA. KAZINFORM - Harvard Growth Lab Ekonomıkalyq kúrdelilik ındeksiniń (Economic Complexity Index, ECI) jańartylǵan nátıjelerin jarııalady. 2024 jyly Qazaqstan 0,38 kórsetkishpen 145 eldiń ishinde 55-orynǵa ıe boldy, dep habarlaıdy Kazinform.
2023 jyly Qazaqstan Ekonomıkalyq kúrdelilik ındeksinde (ECI) 89-orynda bolyp, kórsetkishi -0,44 deńgeıinde baǵalanǵan edi. Alaıda keıin jarııalanǵan jańartylǵan redaktsııada sol jyldyń derekteri qaıta qaralyp, respýblıka 0,45 oń mánimen 52-orynǵa kóterildi. Osy ózgeristen keıin Qazaqstan 2023 jyldan bastap kúrdeli ekonomıkasy bar elder qataryna endi.
2024 jyldyń qorytyndysy boıynsha el 55-orynǵa turaqtady. ıAǵnı, ótken jylǵy 52-orynmen salystyrǵanda úsh satyǵa tómendegenimen, jalpy dınamıka ekonomıkalyq qurylymdyq ilgerileýdi kórsetedi.
Atap aıtqanda, 2020–2024 jyldar aralyǵynda Qazaqstan 87-orynnan 55-orynǵa deıin kóterilip, 32 pozıtsııaǵa alǵa jyljydy. Bul – óńir elderi arasyndaǵy eń aıqyn ósimderdiń biri.
Salystyrý úshin aıtsaq, osy kezeńde Ózbekstan 86-orynnan 70-orynǵa, Qyrǵyzstan 78-orynnan 72-orynǵa, Túrikmenstan 127-orynnan 126-orynǵa kóterildi. Al Reseı kerisinshe 38-orynnan 67-orynǵa tómendedi.
Aıta ketý kerek, Qazaqstannyń 2025 jylǵa deıingi strategııalyq damý josparynda ECI boıynsha 55-orynǵa jetý maqsaty qoıylǵan bolatyn. 2024 jylǵy nátıje osy mejege merziminen buryn qol jetkizilgenin kórsetedi.
Halyqaralyq bıznes-strateg Aleks Matsson Kazinform agenttigine bergen suhbatynda reıtıngtegi ilgerileý ekonomıkany ártaraptandyrý men ınstıtýtsıonaldyq reformalardyń nátıjesi ekenin atap ótti.
— 89-orynnan 55-orynǵa kóterilý básekege qabiletti ári tehnologııalyq turǵydan kúrdeli ekonomıkalyq modeldiń qalyptasyp kele jatqanyn bildiredi, — dedi sarapshy.
Onyń aıtýynsha, bul kórsetkish ónerkásipti jańǵyrtýǵa, eksporttyq áleýetti keńeıtýge jáne adamı kapıtaldy damytýǵa baǵyttalǵan júıeli memlekettik saıasattyń jemisi.
Sarapshy sondaı-aq Qazaqstannyń Eýropa men Azııa arasyndaǵy strategııalyq ornalasýy, ınstıtýtsıonaldyq turaqtylyǵy jáne halyqaralyq yntymaqtastyqqa ashyqtyǵy ınvestıtsııalyq tartymdylyqtyń artýyna yqpal etip otyrǵanyn aıtty.
Osylaısha, ındekstegi pozıtsııanyń jaqsarýy tek statıstıkalyq derekterdiń qaıta qaralýymen ǵana emes, ekonomıkany ártaraptandyrýǵa jáne shıkizattyq modelden birtindep alshaqtaýǵa baǵyttalǵan qurylymdyq ózgeristermen baılanysty.
Buǵan deıin Qazaqstan Eýrazııa óńiri elderi arasynan tikeleı sheteldik ınvestıtsııa tartý qarqyny boıynsha kóshbasshylar qataryna engeni habarlanǵan edi.
Aǵylshyn tilindegi mátinniń túpnusqasyn myna jerden oqýǵa bolady.