Qazaqstan EAEO-nyń ortaq energetıkalyq naryǵyna qatysty ustanymyn jarııalady
ASTANA.KAZINFORM - Búgin elordada Eýrazııalyq ekonomıkalyq odaqqa múshe memleketterdiń energetıka salasyndaǵy ýákiletti organdary basshylary keńesiniń otyrysy ótti. Qazaqstan Respýblıkasy Energetıka mınıstrligi Odaqtyń ortaq saýda-energetıkalyq keńistiginiń arhıtektýrasyn qalyptastyrýdaǵy elimizdiń negizgi qaǵıdattaryn jarııalady.
Eýrazııalyq ekonomıkanyń damýy qatysýshy elderdiń tıimdi tepe-teńdik tabýyna tikeleı baılanysty. Energetıka mınıstri Erlan Aqkenjenov naryqtardy ıntegratsııalaý kezeń-kezeńimen ári makroekonomıkalyq turǵydan muqııat eseptelgen tásildi talap etetinin atap ótti.
- Gazdyń, munaıdyń jáne elektr energııasynyń erkin qozǵalysyna arnalǵan ortaq keńistikti qalyptastyrý ulttyq múddelerdi qorǵaýǵa negizdelýi tıis. Qazaqstan úshin ishki naryqty energııa resýrstarymen turaqty qamtamasyz etý jáne óńirlerde tapshylyqqa jol bermeý — absolıýtti basymdyq, — dep atap ótti Erlan Aqkenjenov.
Mınıstrdiń aıtýynsha, kólik ınfraqurylymyna qol jetkizýdiń ádil algorıtmderin qalyptastyrý, biryńǵaı tsıfrlyq júıelerdi engizý (sonyń ishinde elektr energııasymen mámileler jasaý kezinde elektrondyq qoltańbalardy transshekaralyq taný) jan-jaqty ári salmaqty jumysty talap etedi.
Qazaqstan Respýblıkasy Energetıka mınıstrligi EAEO seriktesterimen qalyptasqan syndarly dıalogty joǵary baǵalaıdy. Senim men kommertsııalyq ózara tıimdilikke negizdelgen pragmatıkalyq tásil túptep kelgende árbir múshe memlekettiń jáne jalpy makroóńirdiń energetıkalyq ári ekologııalyq qaýipsizdigin kúsheıtedi.
Aıta keteıik, osyǵan deıin Erlan Aqkenjenov EAEO ortaq energetıkalyq naryǵynyń perspektıvasy týraly aıtty.
