Qazaqstan EAEO-nyń biryńǵaı tsıfrlyq akkredıtteý keńistigin qalyptastyrýdy usyndy
ASTANA. KAZINFORM - Qazaqstan astanasynda Dúnıejúzilik akkredıtteý kúnine oraı «Innovatsııalar, senim jáne turaqtylyq: akkredıtteýdiń yqpaly» atty halyqaralyq forým ótti, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Іs-sharaǵa Eýrazııalyq ekonomıkalyq komıssııanyń, EAEO-ǵa múshe memleketterdiń akkredıtteý organdarynyń ókilderi, sondaı-aq Ózbekstan men Qytaıdan kelgen delegattar qatysty.
Forýmda sáıkestikti baǵalaý úderisterin tsıfrlandyrý, halyqaralyq yntymaqtastyqty damytý jáne Eýrazııanyń ortaq naryǵyndaǵy ónim sapasyn baqylaýdy kúsheıtý máseleleri talqylandy.
Forýmnyń ashylýynda Qazaqstan Respýblıkasy Saýda jáne ıntegratsııa birinshi vıtse-mınıstri Aıjan Bıjanova sóz sóılep, akkredıtteýdiń búginde tehnıkalyq rásim sheńberinen shyǵyp, ekonomıkalyq turaqtylyqty qamtamasyz etýdiń, halyqaralyq saýdany damytýdyń jáne tutynýshylar quqyǵyn qorǵaýdyń mańyzdy tetigine aınalǵanyn atap ótti.
-Akkredıtteý burynnan beri sáıkestikti baǵalaýdyń tehnıkalyq quraly ǵana emes. Ol halyqaralyq saýdanyń, ınvestıtsııalyq tartymdylyqtyń jáne memlekettiń ekonomıkalyq ornyqtylyǵynyń mańyzdy quramdas bóligine aınaldy. Árbir sertıfıkattyń, synaq hattamasynyń jáne standarttyń artynda adamdardyń qaýipsizdigi, ómir sapasy men tutynýshynyń satyp alǵan ónimine degen senimi tur. Halyqaralyq ozyq tájirıbege súıene otyryp, biz baqylaýdan táýekelderdi basqarýǵa jáne tsıfrlyq qadaǵalaýǵa negizdelgen jańa júıege kezeń-kezeńimen kóship kelemiz, – dedi Aıjan Bıjanova.
Qazirgi tańda Qazaqstanda 1700-den astam akkredıttelgen sýbekt jumys isteıdi. Ulttyq akkredıtteý júıesi turaqty túrde damyp, aýqymyn keńeıtip keledi. Bıyl Qazaqstan EAEO-ǵa múshe memleketterdiń akkredıtteý organdary basshylary keńesine tóraǵalyq etip, ózara senimge negizdelgen biryńǵaı tsıfrlyq keńistik qalyptastyrý bastamalaryn ilgeriletýde. Forým barysynda jabdyqtary tsıfrlyq júıemen biriktirilgen Smart Labs zerthanalaryn damytý máselesine erekshe nazar aýdaryldy. Zamanaýı tehnologııalar synaq nátıjelerin avtomatty túrde jiberýge, kórsetkishterdi operatordyń qatysýynsyz tirkeýge, barlyq árekettiń tsıfrlyq izin saqtaýǵa jáne adam faktorynan týyndaıtyn táýekelderdi azaıtýǵa múmkindik beredi. Ulttyq akkredıtteý ortalyǵynyń bas dırektory Iskander Hamıtov óńir elderi sáıkestikti baǵalaý nátıjelerin ózara taný men senim qalyptastyrý baǵytynda ortaq ustanymdarǵa bet buryp otyrǵanyn aıtty.
-Qazaqstan ulttyq akkredıtteý júıesin damytý, úderisterdi tsıfrlandyrý jáne halyqaralyq deńgeıdegi senimdi nyǵaıtý jóninde aýqymdy mindetter qoıyp qana qoımaı, olardy naqty iske asyryp keledi. Ashyq yntymaqtastyq pen sáıkestikti baǵalaýdaǵy biryńǵaı tásilder ǵana EAEO keńistiginde turaqty ári básekege qabiletti ortaq naryq qalyptastyrýǵa múmkindik beredi dep esepteımiz, – dedi Iskander Hamıtov.
Forým sońynda otandyq sapa ınfraqurylymynyń halyqaralyq deńgeıde tanylýyna jáne qazaqstandyq sertıfıkattarǵa degen senimniń artýyna úles qosqan sala mamandary marapattaldy.
Aıta keteıik, osyǵan deıin Qasym-Jomart Toqaev EAEO elderine tsıfrlyq kólik dálizderiniń ekojúıesin qurýdy usynǵan bolatyn.
