Qazaqstan EAEO men Iran arasyndaǵy erkin saýda kelisimin uzartýdy ratıfıkatsııalady

NUR-SULTAN. QazAqparat – Eýrazııalyq ekonomıkalyq odaq elderi jáne Iran arasynda erkin saýda aımaǵyn qurýǵa alyp keletin ýaqytsha kelisimge hattamany ratıfıkatsııalaý týraly zań Májiliste qaraldy, dep habarlaıdy QazAqparat tilshisi.

Eýrazııalyq ekonomıkalyq odaqqa múshe memleketter jáne Iran Islam Respýblıkasy arasyndaǵy erkin saýda aımaǵyn qurýǵa alyp keletin ýaqytsha kelisim hattamasy 2022 jylǵy 14 naýryzda Tegeran qalasynda jasaldy.

«Iran 80 mıllıonnan astam halqy bar perspektıvaly naryq. Ýaqytsha kelisimge kelgeli Qazaqstan men Iran arasyndaǵy taýar aınalymy 16,6%-ǵa ıaǵnı 377,4 mln dollardan 440 mln dollarǵa ósti. Pandemııa kezinde (2020 jyly) saýda belsendiliginiń tómendegenin baıqadyq. Degenmen bul álemdik úrdis. Alaıda ótken jyly eki el arasyndaǵy taýar aınalymy qaıta qalpyna kelip, tipti 2019 jylǵy kórsetkishten asyp tústi. Bul ýaqytsha jasalǵan kelisimniń oń áseri», - dedi QR Saýda jáne ıntegratsııa birinshi vıtse-mınıstri Erlan Battaqov Májilistiń jalpy otyrysynda.

Onyń aıtýynsha, EAEO men Iran arasyndaǵy erkin saýda týraly ýaqytsha kelisimniń merzimi bıyl 27 qazanda aıaqtalady.

«Oń saýda serpinin jáne qazaqstandyq eksporttyń áleýetin eskere otyryp, biz saýdanyń preferentsııalyq rejıminiń úzilýine jol bermeýimiz kerek. Ýaqytsha kelisim hattamasyn ratıfıkatsııalaý onyń qoldanylýyn uzartýǵa múmkindik beredi. Osylaısha saýdanyń bajsyz rejımin saqtap, otandyq taýarlardyń Iran naryǵyna shyǵýyna jaǵdaı jasaıdy», - deıdi ol.