Qazaqstan EAEO elderiniń kólik baqylaýy týraly aqparat almasý júıesine qosylmaq
ASTANA. KAZINFORM — Eýrazııalyq ekonomıkalyq odaq elderi shekaradaǵy kólik baqylaýynyń nátıjeleri týraly aqparatty jedel almasý jumysyn jolǵa qoıyp jatyr. Qazaqstan da jaqyn arada osy júıege qosylady. Bul týraly New Silk Way halyqaralyq forýmynda Eýrazııalyq ekonomıkalyq komıssııanyń kólik jáne ınfraqurylym jónindegi múshesi Arzybek Kojoshev aıtty.
Onyń málimetinshe, qazir Belarýs, Qyrǵyzstan jáne Reseı kólik baqylaýynyń nátıjeleri týraly málimetterdi elektrondy júıe arqyly bir-birine jiberip otyr. Búginge deıin júıe arqyly 400 myńnan astam aqparat almasý operatsııasy júrgizilgen.
— EAEO elderi odaqtyń syrtqy shekaralarynda júrgizilgen kólik baqylaýynyń nátıjeleri týraly aqparat almasýdy jolǵa qoıyp jatyr. Bul kólik baqylaýynyń nátıjeleri týraly málimetterdi naqty ýaqyt rejıminde almasýǵa múmkindik beredi. Jaqyn arada Qazaqstan da osy júıege qosylady, — dedi Arzybek Kojoshev.
Sonymen qatar EAEO elderiniń zııatkerlik kólik júıelerin ózara baılanystyrý jumystary jalǵasyp jatyr. Alǵashqy kezeńde memleketter jol jaǵdaıy men aýa raıy týraly málimetterdi bir-birine berýdi josparlap otyr.
Kojoshevtiń aıtýynsha, sarapshylardyń esebinshe, mundaı júıelerdi engizý júk tasymaldaý ýaqytyn 30 paıyzǵa deıin qysqartyp, kólik ınfraqurylymynyń ótkizý qabiletin 10 paıyzǵa arttyrýǵa múmkindik beredi.
Budan bólek, tasymaldaýshylardyń shyǵyny 15 paıyzǵa deıin azaıýy múmkin.
EEK ókili elderdiń kólik salasyndaǵy aqparattyq júıelerin ózara baılanystyrý halyqaralyq tasymaldyń tıimdiligin arttyrý úshin mańyzdy ekenin atap ótti.
Buǵan deıin Qazaqstan men Reseı elektrondy júkqujat arqyly júk tasymaldaýǵa kóshetini habarlandy.
