Qazaqstan EAEO elderine ortaq tehnıkalyq retteý ortalyǵyn qurýdy usyndy
«Qazaqstanda ótken jyldyń 1 shildesinen bastap tehnıkalyq retteý jónindegi úılestirý ortalyǵy jumys istep jatyr. Atalǵan ortalyqtyń negizgi mindetterine tehnıkalyq reglament jobalary men olarǵa ózgerister boıynsha ustanymdy qalyptastyrýǵa qatysý, kásiporyndardyń tehnıkalyq reglamentterdi engizýge ınfraqurylymdyq ázirligin taldaý jáne tehnıkalyq reglamentterdi qoldaný boıynsha monıtorıng júrgizý kiredi. Sonymen qosa tehnıkalyq reglamentter men standarttardyń ǵylymı-tehnıkalyq deńgeıin baǵalaý mindeti jatady», - dedi QR Saýda jáne ıntegratsııa mınıstrligi tehnıkalyq retteý jáne metrologııa komıtetiniń tóraǵasy Arman Ábenov Bishkekte ótip jatqan Eýrazııa ekonomıkalyq forýmynda.
Sondaı-aq, komıtet basshysy atalǵan úılestirý ortalyǵynyń jumysyn EAEO kóleminde keńeıtýdi usyndy.
«Biz 2010 jyldan bastap tehnıkalyq reglamentterdi ázirleýmen tikeleı aınalysatyn kásibı mamandar men salanyń úzdik sarapshylaryn úılestirý ortalyǵynda jumys isteýge shaqyrdyq. Bul ınstıtýtsıonaldyq jadty saqtaý maqsatynda jasalyp otyr. Osy oraıda bizdiń komıtet EAEO-ǵa múshe memleketterde tehnıkalyq retteý jónindegi úılestirý ortalyqtaryn qurýdyń uqsas modelin ázirleýdi usynady. Eýrazııalyq ıntegratsııany damytýdyń 2025 jylǵa deıingi strategııasynda standarttaý jumysyn josparlaýdy úılestirýge, standarttaý salasyndaǵy ǵylymı-zertteý jumystaryn júıeli damytýdy qamtamasyz etý jáne EAEO-nyń tıisti aktilerin qabyldaý maqsatynda júrgizýge baǵyttalǵan is-sharalar kózdelgen», - dedi Arman Ábenov forýmda.
Buǵan deıin saýda mınıstrliginiń ókili Qazaqstannan EAEO elderine qandaı taýar túrleri eksporttalatynyn aıtyp ótti.
