Qazaqstan EAEO elderimen shekaraǵa 32 baqylaý pýnktin ornatady

NUR-SULTAN. QazAqparat - Qazaqstan Eýrazııalyq ekonomıkalyq odaqqa múshe memlekettermen shekaraǵa 32 baqylaý pýnktin ornatady. Bul týraly búgin Úkimet otyrysynda veterınarlyq jáne fıtosanıtarlyq qaýipsizdik máseleleri týraly baıandaǵan Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Elimizdiń veterınarlyq jáne fıtosanıtarlyq qyzmetteriniń belsendi jumysynyń arqasynda basqa elderdiń tizilimderine barlyǵy 2557 qazaqstandyq eksporttaýshy kásiporyn, onyń ishinde Eýrazııalyq ekonomıkalyq odaq tiziliminde 2212 otandyq kásiporyn engenin taǵy da atap ótý mańyzdy. Reseıdegi aldyn ala habarlaý pýnkteri sekildi Qazaqstan aǵymdaǵy aıdan bastap Eýrazııalyq ekonomıkalyq odaqqa múshe memlekettermen shekaraǵa jaqyn jerlerde 32 veterınarlyq jáne fıtosanıtarlyq baqylaý pýnktin ornatýda», - dedi S.Omarov.

Onyń aıtýynsha, árbir baqylaý pýnkti Qazaqstannyń basqa da qyzmetterimen jáne shekaralas Eýrazııalyq ekonomıkalyq odaqqa múshe memleketterdiń osyǵan uqsas qyzmetterimen ózara aqparattyq is-qımyl jasasý úshin tehnıkalyq jaraqtandyrylǵan. Sondaı-aq árbir baqylaý beketinde ekspress-taldaý júrgizýge arnalǵan jyljymaly zerthana jáne keri qaıtarýǵa múmkin emes, el aýmaǵyn zalaldaý qaýpi joǵary asa qaýipti júkterdi joıýǵa arnalǵan qazirgi zamanǵy pesh (ınsenırator) bar.

«Atalǵan pýnkterde taýarlardyń kelip-ketýine baqylaý júrgizý basqa da memlekettik organdardyń ózara is-qımyl júrgizýin qajet etedi. Máselen, shekarashylar men kedenshilerden taýarlardyń shekara arqyly ótkeni týraly shuǵyl aqparatty baqylaý pýnkterine jetkizý, Іshki ister departamentiniń avtoınspektorlarynan jáne Kólik komıtetiniń kóliktik baqylaý ınspektorlarynan kólik quraldaryn toqtatý jáne qujattaryn tekserý, qajet bolǵan jaǵdaıda, keri qaıtarylatyn júkterdi shekaraǵa deıin alyp júrý boıynsha járdem qajet bolady. Bul taýarlardyń ımporty men tranzıtin tıimdi baqylaýǵa, veterınarııalyq, fıtosanıtarııalyq jáne tamaq qaýipsizdigi talaptaryna, sondaı-aq tehnıkalyq reglamentterge sáıkes kelmeıtin ónimderdi el aýmaǵyna kirgizýge jol bermeýge múmkindik beredi», - dedi ol.

Mınıstrdiń paıymynsha, mundaı jumysty júrgizýdiń mańyzdy ekenine barlyq baqylaý-qadaǵalaý organdary, onyń ishinde Bas prokýratýra da túsinistikpen qaraýy tıis.

«Sondaı-aq jergilikti atqarýshy organdarmen, qoǵamdyq birlestiktermen, halyqaralyq uıymdarmen veterınarııalyq jáne fıtosanıtarııalyq salamattylyqty qamtamasyz etý boıynsha birlesip jumys isteý mańyzdy», - dedi ol.